Shillong, Lber, 09: Ka Federation of Khasi Jaiñtia and Garo People (FKJGP) Central Body ha ka sngi Saitjai] kum shibynta ban pynshlur bad ai mynsiem ïa ka JETS 24×7, kaba dei kawei na ki kynhun kaba nyngkong tam ha ka jylla kaba dang shu ïoh shen ïa ka jingithuh na ka Sorkar Jylla ban pynïaid ïa ka kam kamai thuk thuk ha ka jylla, ka seng ka la pynlong ïa ka jingïalang pynkup burom ha ophis treikam kaba don ha Mawlai Kyntonmassar, ha kaba la ïa don lang ki nongïalam kiba hakhmat eh jong ka seng bad kumjuh ruh ki dkhot na ka JETS 24×7.
Ha ka jingïalang ba la pynïaid da u President ka FKJGP Central Body Bah Dundee Cliff Khongsit u la maitphang ba kum ka seng kaba don ïa ka jing angnud ban kyntiew ïa ka ïoh ka kot ha ka jylla bad ban pynshlur ïa ki khynnah samla ban ieng ha la ki jong ki kjat khnang ba kum ki trai ri trai muluk kin bat hi ïa u lakam jong ka khaii – pateng, ka dei ka kamram jong ka seng ban shim ïa kane ka sienjam ban pynkup burom kyrpang ïa ka JETS 24×7 kaba la trei minot khlem shongthait tad haduh ba kan da ïohpdiang ïa ka jingithuh na ka Sorkar ban pynïaid ïa ka kam kamai thuk thuk (Two wheelers) ha ka jylla.
U Bah Dundee u la ong ruh ba ka long ka jingsarong ïa ka jaitbynriew ba ki khun samla ki la kotbor ban don ïa ka mynsiem ïakhun bad kiwei pat ki kompeni kiba wan ban seng kam ha kane ka jylla.
Haba kren ha ka jingïalang pynkup burom na ka liang u General Secretary ka FKJGP Central Body Bah Eldie N Lyngdoh, u la ong ba kum ka jaitbynriew ka la dei ban bret noh shaba sep ka sngi ïa ki kyntien phlan duman kiba ong ba ki jaitbynriew jong ngi ki long kum ki tham kiba ïaleh ban tan uwei ïa uwei hynrei kum ka jaitbynriew ngin pyneh rngiew pat da kaba ngin long ki nongkyrshan bad nong aibuit ban kyntiew iwei ïa iwei.
Ha kawei pat ka bynta u Senior Vice President jong ka seng u Bah Elton Cliff Warjri u la lyntu ïa ka JETS 24×7 ba kan long kaba peitngor ba ki nongleit jingleit kin ïoh ïa ka jingshngaiñ ha ka leit ka wan bad ha kajuh ka por ruh ban tehlakam na ki nongshim kabu kiba pyrshang ban khñiot dor na ki paidbah.
Haba pynpaw ïa ka jingsngewkmen bad sngewïoh mynsiem u Managing Director jong ka JETS 24×7 Bah Pynskhemlang W. Uriah u la ai khublei kyrpang ïa ka FKJGP Central Body kaba la ju ai lang ka kti ka mon ka kti kadiang na ka por sha ka por haba kum ka kynhun ka donkam ïa ki jingai jingmut jong ka seng.
U la bynrap ruh da kaba ong ba kane ka dei ka sien kaba nyngkong eh ba kum ka kynhun kan ïoh ïa ka jingshah pynkup burom bad kum ka kynhun kan ïai pyrto shijunom bad kan ym klet ïa ka seng FKJGP ha kaba u la ong ruh ba kum ka kynhun hi kan ïaleh ban trei shitom ban pynïar ïa ka rukom treikam ban long kum ka jing plié lad plié lynti ïa ki khun samla jong ka jylla ha ka ïoh kam ïoh jam.
