Shillong, Lber, 09: Da kaba buh hakhmat ïa ka thong ban wanrah biang sa shisien pat ia ka jingkhuid jingsuba jong ka Wah Umkhrah kaba dei ka wah kaba bna nam bha ha ki por kiba mynshwa, ka Green Tech Foundation (GTF) ka la shim ïa ka sienjam da kaba pynkhuid ïa ki bynta jong ka Wah Umkrah hajan Weiking, ka Seng Khasi College.
Kane ka sienjam jong ka Green Tech Foundation ka dei ka sien baar bad kaba nyngkong eh ka dei halor ka jingpynkhuid ïa ka wah Nondeiñ ha Nongstoiñ, West Khasi Hills District bad kane ka sienjam ba la shim ha Nongstoiñ ka dei ka projek kaba jop namarba baroh ki ïa snohkti lang.
Shwa ban pynkhuid ïa ka wah Umkhrah na ka liang jong ki dkhot ka Green Tech Foundation (GTF) ki la ber shwa da ki kynja dawai ban lait na kino kino ki jingsma kaba mih na ki jaboh jong ka wah.
Ha kane ka jingpynkhuid ïa ka Wah Umkhrah, ka Green Tech Foundation (GTF) ka la pyndonkam da ki lieng ban tong bad ban khat ïa ki ñiut ki ñier bad ïa ki jaboh kiba lang ha kane ka wah.
U Chairman jong ka Foundation u Bah H. Bansiewdor Nonglang haba kren sha ki lad pathai khubor u la pynpaw ba ka jingong ba duh jingkyrmen ban pynkhuid ïa ka Wah Umkhrah ka dei tang ka nia ha ki dukan sha hynei lada don ka mon kumta lada don ka jingkitkhlieh bad ka long kaba donkam ban ïamih lang ban pynkhuid ïa kane ka wah kaba la nguid ki phew lak ton ki jaboh ba la pyntuid na kylleng ka sor Shillong.
