PYRSHAH KI PAIDBAH ÏA KA PUBLIC HEARING KA TOPCEM BAN PYNHEH ÏA KA CCP
Khliehriat, Nailar, 24: Ka jingpynsngew paidbah lane ka Public Hearing jong ka Meghalaya Cement Ltd jong ka Topcem Thangskai, ka la ïaid beit shakhmat hapoh Hall jong kane ka karkhana pynmih dewbilat hadien ba ki paidbah kiba pyrshah ïa kane ka jingpynsngew paidbah ki la pynjulor naphang ïa ka ingdara, ïa ki shuki, ki miej bad ïa kiwei kiwei tiar ba la buh ban pynlong ïa kane ka jingïalang ha ka sngi Palei.
Naduh ka por 11:00 baje mynstep thik, ki paidbah kiba pyrshah ïa ka jingpynsngew paidbah ka Topcem kiba rah ryngkat bad ki plakad ki la wan poi ha khyrdop jong ka karkhana bad ha kane ka por ka la sdang ka jingïapynibor bad ki Pulit kiba la ap pahara hakhmat kane ka khyrdop.
Hapdeng ka jingïakhun bad ki Pulit, ki paidbah ki la ïohlad ban rung shapoh ka jaka pynlong jingïalang bad pynpra naphang ïa ka ingdara bad ïa ki miej ki shuki.
Namarba la mih ka jingpynibor jong ki paidbah bad ki dkhot jong ki sengbhalang, ki Pulit ki la hap ban siat pynbthei da ki bom pynsat khmat ne Tear Gas bad kawut lathi naphang ïa ki paidbah. La lap ba ki don napdeng jong ki paidbah kiba la mynsaw na ka jingsiat Tear Gas jong ki Pulit bad ha ka jingïatur paidbah ban ïoh rung sha ka jaka pynlong Public Hearing. Kawei ka longkmie ka la mynsaw na ka kti, don ruh kiba la mynsaw na kjat, na met.
Haba kren ha ka jingïalang, ki nongpynïaid ka kompeni ki la pynshai halor ka jingthmu jong ka Meghalaya Cement Ltd (Topcem) haba pynheh ne pynïar ïa ka Cement Clinkerisation Plant kaba na ka 2600 TPA (0.858 million MPTA sha ka 4500 TDP (1.485 million TPD lem bad ka 10MW CPP bad ka 9.5 MW WHRS, ha shnong Thangskai bad pynshai ruh ïa ki bynta kiba ïadei bad kane ka projek.
Ha kane ka jingpynsngew paidbah ba la pynlong hapoh ka Hall jong ka kompeni la ïa don lang ki Ophisar jong ka Meghalaya State Pollution Control Board (MSPCB), u Additional Deputy Commissioner ka East Jaiñtia Hills District u Bah G. Warjri bad katto katne ki trai shnong kiba kyrshan ïa kane ka Public Hearing.
U Bah Warjri ha ka jingïakren bad ki lad pathai khubor u la ong, “ha kane ka Public Hearing, ngi la ïoh ban pynsngew ha kaba ïadei bad kine ki kam ka kompeni halor ka jingthmu jong ka. Ngi la ïohsngew ïa ka jingpynsngew na ka liang ka kompeni bad hadien kata ngi la khot ïa ki briew ba kin ai kano kano ka jingpynsngew kat kaba ki don katkum ka jingsngew jong ki. Katto katne ki la wan ban ai jingkren bad ngi la buh rekod lut baroh.”
U la ong ïathuh ruh ba um don jingtip eiei halor ka jingpyrshah jong ki paidbah namarba u shu wan sha kane ka jingpynsngew paidbah kumba la bthah da u Deputy Commissioner bad u shu pyndep ïa la ka kamram bad ong ruh ba katba dang pynlong ïa ka jingïalang la shu ïohsngew ïa ka jingpynthei ïa ki bom tear gas shabar.
Ki paidbah bad ki Sengbhalang kiba pyrshah ïa kane ka Public Hearing ki la ong, “wat hadien ba la pynpra da ki paidbah bad ki sengbhalang ïa ka ingdara, hynrei ki (kompeni) la pynlong sopsop ïa ka Public Hearing hapoh Community Hall jong ka kompeni bad ki Pulit pat ki la shoh la tied ïa ki paidbah shabar khlem da ailad ïa ki paidbah kiba pyrshah ba kin rung shapoh ka jingïalang.”
“Ïa kane ka Public Hearing la shu pynlong shapoh ha kaba tang katto katne ngut ki trai shnong ki don. Baroh kiba ïashim bynta ki dei tang ki nongtrei jong ka kompeni bad ki bahaïing hasem jong ki,” la kynnoh ki paidbah.
Ki la ong ba ki paidbah bad ki sengbhalang kiba pyrshah kim lah satia ban pdiang ïa kane ka jingleh jong ka Sorkar bad kynnoh ruh ba ka dei ka Public Hearing kaba la shu pynlong sopsop.
Katkum u kyrwoh ba la phah da u Superintendeng of Police ka East Jaiñtia Hills District u Jagpal Singh Dhanoa, u la pyntip hadien ba ki paidbah ki la pynpra ïa ka ingdara, da ka jingïakren hapdeng ki bor synshar district, ki ophisar na ka Meghalaya Pollution Control Board, ki bor pynïaid shnong bad ki nongpynïaid ka Kompeni ïa ka jaka pynlong public hearing la pynkynriah noh sha ka Hall jong ka Kompeni.
“Ha ka por 2:00 baje nohphai sngi, ki paidbah ki la tur biang sha ka jaka ba la pynlong ïa ka jingïalang ban pynthud ïa ka jingïalang. Wat hapdeng ka jingkyrpad ba la bun bun sien, ki paidbah ki la nang khie bitar bad thaw jingkulmar. Ki la kawang da ki maw kat haduh ba ka la buh jingma ïa ka jingim jong ki paidbah, ki nongsynshar district bad ki Pulit. La pyrshang ban pynpra ïa ka jingïalum paidbah. Khyndai ngut ki Pulit ki la mynsaw ha kane ka jingjia,” la ïathuh u SP.
Ki Pulit ki la register case hapoh Lumshnong Police Station hapoh ka Section 143/144/145/148/152 jong ka Indian Penal Code (IPC). Ka jingtohkit halor kane ka jingjia ha kane ka sngi ka dang ïaid shakhmat.
