Khliehriat, Nailar, 24: Hapdeng ka jingïapynibor hapdeng ki paidbah bad ki bor Pulit jong ka East Jaiñtia Hills District ban ïoh rung sha ka jaka ba la pynlong ïa ka jingïalang pynsngew paidbah ba la pynlong da ka Meghalaya Pollution Control Board na ka bynta ka Meghalaya Cement Ltd (Topcem) haba pynheh ne pynïar ïa ka Cement Clinkerisation Plant kaba na ka 2600 TPA (0.858 million MPTA sha ka 4500 TDP (1.485 million TPD lem bad ka 10MW CPP bad ka 9.5 MW WHRS, ha ka shnong Thangskai ha ka sngi palei.
La sakhi ruh ba ki don napdeng ki nongtrei bar jylla jong ka kompeni Topcem kiba la kynshoit ne pynshit ïa ki Pulit ban phah tangoh bad ban kawut lathi naphang ïa ki nongïakhih da kaba pynmih ruh wat ïa ki tien sih tien sang pyrshah ïa ki nongïakhih.
Kane ka jingleh khlemakor jong ki nongtrei bar jylla ka Topcem ka la pynbitar shuh shuh ïa ki paidbah bad ki la byrngem ruh ba kin ujor da ka ejahar pyrshah ïa kine ki bar jylla kiba kren khlemakor da ka ktien sih ktien sang.
La ïohsngew ruh bad la ïoh rekod ha ka camera ba kine ki bar jylla ki la kynshoit ïa ki Pulit ba kin shoh kin dat naphang ïa ki paidbah da kaba ong ‘Maro Maro Sale……….”
