Shillong, Nailar, 24: Ki Pulit ka nongbah Shillong ha ka sngi palei ki la register case bad kem noh ia u nongñiah Scooty uba la tynrah ia uwei u khynnah skul uba pule ha ka Class-XI ha St. Edmund’s Higher Seconcondary School, Shillong katba u mih na Anton Hall ban jam sha shiliang surok kaba don markhap bad ka Dos Bocso Technical School, Shillong.
U Superintendent of Police (City) ka East Khasi Hills District Bah Vivek Syiem ha u kyrwoh ba la phah sha ki lad pathai khubor u la iathuh ba kane ka la jia ha ka por 10.55 baje mynstep ha kaba u nongñiah ia ka Scooty (bym don registration plate) uba kit lang ia u paralok u la tynrah ia utei u khynnah skul hadien ba la ñiah stet bha ia kane ka thuk thuk ar shaka.
Ia u khynnah skul uba la mynsaw, la pynkit mar mar da ki paidbah sha Woodland Hospital da ka local taxi.
Ki Pulit kiba la wan poi ha kane ka jaka ki la bat noh ia u nongñiah Scooty bad ia uba shong lang bad phah leh medical check-up Woodland Hospital namar ba kine ki arngut ruh ki la mynsaw.
U SP u la iathuh ba ki doktor ki la bat noh ia u khynnah skul hapoh Hospital ban ai jingsumar namar ba ka kjat ka mon ka la paitdoh bad mynsaw ruh na ki bynta jong ka khlieh.
La pyntip ruh ba ki bahaïing hasem jong une u khynnah skul ki la pynkynriah noh ia u sha GNRC Guwahati ha kaba mynta u la don ha ka jingtip briew.
