Shillong, Ïaïong, 25: U Vishal Pandey uba dei u trai jong ka dukan Mobile Store JS Enterprise kaba don ha Laitumkhrah, Shillong kaba don markhap bad ka Laitumkhrah Police Station, ha ka sngi Baar mynta ka taiew u la mudui da ka ejahar ha ki Pulit jong ka Laitumkhrah Police Station ban pyntip ba ha ka 22 tarik mynta u bnai ha ka por kumba 4:30 baje janmiet kawei ka Mobile iPhone kaba don ia u IMEI Number 35035561-9769676 ka la shah tuh napoh dukan.
Ia ka jingshah tuh jong kane ka Mobile Phone la ioh ring dur lut nadong shadong lyngba ka CCTV Camera ba la pyndait hapoh kane ka dukan ha kaba la lah ban iohi shynna wat ia ka dur jong ki lai ngut ki briew kiba donkti ha kane ka kam runar.
Tang shu pynmih ia kane ka khubor ha ka YouTube Channel jong ka Batesi Tv, hapoh khyndiat kynta ki la don ki briew kiba la pyntip halor ka jingshah tuh na ka dukan jong ki.
Ka kynhun lum khubor jong ka Batesi Tv kaba la leit ban iakynduh markhmat bad ki trai jong ka dukan kiba la ngat ha kane ka apot kaba la tip kyrtteng kum ka Esmasa Collection kaba don ha Laitumkhrah pyrshah bad ka Post Office kaba la long trai da ka Kong Koridian Wahlang.
Ha jingiakren bad u Bah Joe Wahlang uba dei u khun jong ka Kong Koridian Wahlang u la iathuh ba ka jingshah tuh ka la jia ha ka 17 tarik Ïaïong, 2024 ha ka por 3:45 noh phai sngi bad u la iathuh ba kine ki lai ngut nongtuh ki dei kijuh ki briew kiba donkti ban tuh ia ka Mobile iPhone na ka dukan die mobile JS Enterprise kaba don ha Laitumkhrah.
Na ka dukan Esmasa Collection ki lai ngut ki snar nonglute ki la tuh ia ki shatri ia kiba la lap da u trai uba la shu ai jingsneng ba kim dei shuh ban dang mlien ban tamti tamjat ia ki mar ki mata da kaba shu lute.
