Shillong, Ïaïong, 25: Ka NEEPCO Tribal Employees’ Welfare Association (NTEWA) ryngkat bad ka NEEPCO Women Welfare Association (NWWA), ki la pynpaw ia ka jingsngewkhia kaba jur halor ka jingkawang petrol bomb da ki runar ia ka kali jong ki Pulit kaba synran ia ka kali jong u Director (Personnel) Maj Gen RK Jha, AVSM(Retd.) ha ka miet sngi Balang ha ka thaiñ Demthring, kaba hap hapoh ka Madanrting Police Station.
Katkum ka thymmei khubor ba la iohlum la iathuh ba kane ka la jia ha ka por kumba 7:25 baje katba ka kali kaba synran ia u Maj. Genl. Jha uba dang mih na ophis ban leit sha la iingsah kaba don ha Laitkor.
La iathuh ba kane ka kali ba la shah kawang petrol bomb ka dei ka kali Thar kaba shong da ki Pulit kiba synran ia u Director (Personel) ka NEEPCO. Mar mar, ki briew kiba don hapoh kane ka kali, ki la kloi ka pynlip noh ia ka ding.
“U Maj. Gen. R.K Jha u dei uba don burom bad uba sngewrit, naduh ba u la trei ha NEEPCO, u dei uba ju trei shitom ban wanrah ia ki song pynroi jong ka NEEPCO bad kumjuh ruh ia ki skhim pynroi, kynthup ia ki projek ha kane ka jylla Meghalaya bad ka thain Shatei Lammiihngi. U Maj Gen RK Jha (Retd.) u dei uba ju peit ruh na ka bynta ka bha ka miat jong ki nongtrei riewlum jong kane ka thain bad kumjuh ruh jong ka nongbah Shillong,” ong kine ki ar tylli ki kynhun jong ki nongtrei ka NEEPCO ba la soi da u General Secretary ka NETWA u Bah Bobby V. Kharlyngdoh bad ka General Secretary jong ka NWWA ka Nikita Bareh.
“Ngi pyrshah jur ia kane ka kam bymman kaba ktah ia ki nongshong shnong ka jylla Meghalaya. Ngi kyntu ia ki bor synshar ba kin shimkhia mardor bad ban kem mardor ia ki nongleh kam bymman,”la ong shuh shuh kine ki ar tylli ki kynhun.
