NA JRONG JINGKIENG UMTYNGAR RYNGKOH U SAMLA

Uwei u samla rangbah ia uba la tip kyrteng kum u Jeffrey Syiemiong, uba la 27 snem ka rta uba sah ha ka shnong Mawprem, Shillong u la ryngkoh nalor ka jingkieng umtyngar shapoh wah ba jylliew jong kane ka jingkieng ha ka 10 tarik u Iaiong, 2023 ha ka por kumba hynriew duna janmiet.
Kane ka jingkieng kaba don ha ka shnong umtyngar kaba long ka jaka kaba ki paidbah baleit ba wan ki ju sngewtynnat ban iengkai pyngngad hajan kane ka jingkieng.
Katkum ka jingiathuh jong ki briew kiba don ha kane ka jaka ki la iathuh ba une u briew u la mih kynsan napoh ka kali Alto 800 Tourist Taxi kaba don ïa u number ML05 U 2320, kaba u shong lang bad ki arngut ki paralok jong u bad tang shu poi ha kane ka jingkieng u la ryngkoh kynsan najrong jingkieng.
Ki paidbah ki la iathuh tang shu iohi ia kane ka jingjia, ki la pyrshang ban leit ai jingiarap ban khwai da u tyllai pynban une u samla u la kyntait ban khawoh ia u tyllai bad hadien kata la shu iohi ba u la ngam jyllop hakane ka wah kaba don hakhrum jong kane ka jingkieng bad jahrngai syndon khlem iohi shuh.
Ha kaba iadei bad kane ka jingjia, ki Pulit kiba la ioh jingtip halor kane ki la leit sha kane ka jaka ban pynlong ia ka jingtohkit bad ban pan jingiarap na ka kynhun Search and Rescue Team ban ioh sei ia une u samla na kane ka wah.
Hadien ba lah poi ka kynhun search and rescue team ki lah ioh ban sei noh ia ka met une u samla ha ka por 9 duna mynta ka miet ha kaba u lah khlad noh na kane ka sla pyrthei.