Shillong, Naitung, 07: U Chief Executive Member (CEM) jong ka Khasi Hills Autonomous District Council (KHADC) u Bah Pyniaid Sing Syiem ha ka sngi palei u la pynbna ba ka Council kan ai baibam ne ka Scholarship sha ki Research Scholar kiba wan shakhmat ban tih bniah ha kaba iadei bad ka synshar ka khadar, ka riti ka dustur bad ka jinglong jingman jong ka jaidbynriew Khasi.
Ha jingiakren bad ki lad pathai khubor, u Bah pyniaid u la ong ba kane ka jingthmu jong ka Council ka long ban pynriewspah ia ka jingtip halor ka riti bad ka dustur jong ka jaidbynriew Khasi namar kumba long haduh mynta ym pat don satia kino kino ki kot kiba la wad bniah halor kine ki bynta kiba ka Council ka lah ban pyndonkam lada don ka jingkulmar ha ka rukom synshar ka khadar.U la iathuh, ha kaba iadei bad kane, ka Executive Committee ka la bynshet ha u EM i/c ka tnat Pule Puthi u Bah Carnes Sohshang ban pyntyllun shakhmat ia kane ka kam bad ia ki kyndon yn sa pynbna kham hadien khnang ba ki Research Scholar kin ioh ia ka baibam kumba ka Council ka la pynbna.
