YM SHYM SHAH KHLONG KA KHMAT U BAH RISHAD KHARMUTEE, PYNSHAI U SP
Shillong, Nailar, 16: Ki Pulit kiba la pynlong ka jingwad ban lap dien ia u Bah Rishad Sing Kharmutee uba la jah rngai na Iewduh ha ka 11 tarik mynta u bnai, ki la lap ia ka met jong u na nala ha Boucher Road, Shillong ha ka sngi baar.
Ha u kyrwoh ba la phah sha ki lad pathai khubor da u Superintendent of Police ka East Khasi Hills, u Bah S. Nongtnger, la iathuh, ha ka 12 tarik mynta u bnai, ha ka por 2:00 baje nohphai sngi, ki Pulit ki la ioh pdiang ia ka jingujor ha Cantonment Beat House na u Bah Teiborlang Kharmutee, 38 snem ba u hynmen jong u, u Bah Rishad Sing Kharmutee uba sah ha Mawdiangdiang, Shillong, u la jah naduh ka 11 tarik, mynta u bnai ha ka por 5:00 baje janmiet bad la iohi khatduh ia u ha jaka ieng Bos Tynring ha Iewduh.
“Mar mar, la pynlong ka jingwad ia u briew ba la jah hapoh u pud u sam jong ka Cantonment Beat House bad ha ki jaka kiba marjan hynrei ym shym la lap dien satia. Ki Pulit ka Police Control Room ki la phah ia kane ka jingtip sha baroh ki OC bad IC jong ka District bad ha ka jylla Meghalaya baroh kawei bad sha ki jylla ka ri India ryngkat bad ka dur jong u briew uba jah ha kane kajuh ka sngi,” la ong u Bah Nongtnger.
Ha ka 14 tarik mynta u bnai ha ka por kumba 8:40 mynmiet, ki Pulit ka Cantoment Beat House ki la ioh jingtip na Shillong Sadar PS ba ha ka por kumba 5:45 baje janmiet la lap ia kawei ka metiap na nala ha Boucher Road, Shillong. Mar mar la pynkit ia ka met sha Civil Hospital, Shillong ban pynithuh bad ban leh ia ka post mortem examination. Ha kane kajuh ka janmiet, ki bahaing hasem ki la pynshisha ia ka met iap ba u dei u Bah Rishad Sing Kharmutee.
Ha ka 15 tarik mynta u bnai, la tohkit bad leh Post Mortem ia ka met iap ha Shillong Civil Hospital, Shillong.
Ka Post Mortem examination ka pynpaw ba kam don kano kano ka dak mong shabar ka met bad shapoh jong ka met. Kam shym don ruh ka jingshah khlong ka khmat katkum ba la pynmih ha ki katto katne ki lad pathai khubor, la iathuh u SP.
“La lap ba u Bah Rishad u don ia ka jingpang ha u klongsnam bad ia ki nuksa la phah sha ka FSL ban pynlong ka jingtohkit. La register case ia kane ka jingjia ha Shillong Sadar Police Station bad ka jingtohkit kaba bniah ban lap shuh shuh ia ki jingshisha ka dang iaid shakhmat,” la iathuh u SP.
