Shillong, Nailar 16: Hadien ba ka Regional Committee jong ka Sorkar Meghalaya bad ka Sorkar Assam ki la pan ia ka kaiphod halor ka jingangnud jong ki paidbah ka shnong Baikam ban iasnoh bad ka Jylla Meghalaya, ha ka 16 tarik u Nailar, 2023, u Block Development Officer na ka liang jong ka Sorkar Meghalaya bad u Circle Officer na ka liang jong ka Sorkar Assam, ki Khasi Pnar kiba sah kane ka shnong kaba hap sha ka Jylla Assam da kawei ka sur ki la pynpaw hakhmat kine ki nongmihkhmat Sorkar ba ki angnud ban pyniasoh ialade sha ka Jylla Meghalaya ha ka jingiapynbeit pud hapdeng ka Sorkar Meghalaya bad ka Sorkar Assam ha kane ka wat kaba ar.
Ha u kyrwoh, ka Secretary jong ka Shnong Baikam ka la iathuh ba ha kane ka jingialang, ki Khasi Pnar shynrang bad kynthei kiba shong basah ha kane ka shnong da kawei ka sur ki la rai ba ki kwah ban pyniasnoh bad ka jylla Meghalaya hynrei lait noh tang ki katto katne ngut kiba kwah ban pyniasoh bad ka Jylla Assam.
Kane ka nongialam shnong ka la kyntu ia u Myntri Rangbah ka Jylla Meghalaya ba un shimkhia ia kane ka jingkwah jong ki Khasi Pnar ba ka sorkar Meghalaya kan kdup ia ki kum ki nong shong shnong bapura jong ka Jylla Meghalaya.
