Shillong, K’lyngkot, 29: Namar ka jingbym leh eiei jong ka Sorkar Meghalaya hadien ba ka Khlieh Umwang SSA LP School kaba don ha ka shnong Khlieh Umwang, Ribhoi District ka la shah pynpra noh ha ki bor ka Sorkar Assam, ka Khasi Student Union (KSU) Eastern Border ha ka Lah Sngi u Blei ka la leit ban iakynduh ia u Myntri ka tnad Pule Puthi ka Sorkar Jylla u Rakkam A. Sangma ban pan jingshai halor ka jingpynslem ban shna thymmai biang ia kane ka skul.
U President ka seng u Samla Banjop Marsing ha ka jingiakren bad ki lad pathai khubor u la iathuh ba ha ki snem baladep ka seng ka ladep ban pynsngew ia kane sha u Myntri ka tnat Pule Puthi khnang ba kan shna thymmai ia kane ka skul.
Katkum ka jingiathuh jong une u nongialam ka KSU, la mang pisa T. 19, 97,500 lak ha u snem 2018 ban shna ia kane ka skul. Hynrei ha ka por ba la thung ia ki paia, ki Pulit Assam ki la wan pynpra ha ka 10 tarik, Nailar, 2018.
“Ha ka por ba la shah pynpra kane ka skul ha Khlieh Umwang, ngi la iakynduh ia u Myntri ka tnat Pule Puthi u Bah Lahkmen Rymbui ha ka por ba ki Pulit Assam ki la rat da ka puhshilum ia kane ka skul. Ha kato ka por u Myntri u la pynpaw ba ia kane ka kam yn sa hap ban iapynbeit da ki bor synshar district,” la iathuh u Samla Banjop Marsing.
U la iathuh ba ka Seng ka la iakynduh ia ka Kong RM Kurbah mynba ka dang long ka Deputy Commissioner jong ka Ribhoi District. “Hynrei ki bor synshar district ki phah sha ka tnat Pule Puthi. Na ka tnat Pule Puthi ki phah kylla sha ki bor synshar distrik. Naduh u 2018 ka la iaid beit kumto. Haduh mynta mynne kane ka skul ka la shu sah beit kumto bad kam shym la don shuh kano kano ka jingmang pisa da ka Sorkar ban shna thymma ia ka skul,” la bynrap une u samla.
U Samla Banjop Marsing u la iathuh ba ha ka jingiakynduh ia u Rakkam A. Sangma, u la telephone hakhmat ki dkhot ka seng ia u Deputy Commissioner ka Ribhoi District bad ong ruh ba un sa shimkhia ia kane ka kam ba la sahteng.
