Shillong, K’lyngkot, 29: Ka Khasi Student Union (KSU) West Jaintia Hills District ha ka Lah Sngi u Blei ka la ujor sha u Myntri ka tnat Pule Puthi jong ka Sorkar Jylla u Rakkam A. Sangma pyrshah ia u Bah Wikiru Shylla uba hikai ha ka Lower Primary School, Larnai, da kaba kynnoh ba u leit hikai skul tang 33 sngi ha ka shi snem watla u ioh tulop manla u bnai.
U Secretary ka KSU West Jaiñtia Hills u samla Hababiangki Biam ha ka jingiakren bad ki lad pathai khubor u la ong, “sngewbha ban leit hikai biang, haba ioh ia ka kam leh bha ia ka kam, ym dei tangba phi ioh ia ka kam tang ban bam pisa ei. Phi ioh ia ka kam ai ia ka nuksa jong phi sha ki khynnah namarba ki dei ki lawei jong ngi.”
“Nga kyrpad ia u nonghikai ba un sngewbha ba un ai ia ka jinghikai jong phi sha ki khynnah ka skul ha Larnai khnang ba kine ki khynnah kin ioh ia ka lawei baphyrnai namarba ka jingnang jingstad ka dei u budlum,” u la ong.
“Sngewsih ba une u nonghikai uba hikai ha Larnai, u wan hikai skul tang 24 sngi, tang 33 sngi, kata kaba sngewsih na ka liang jong ka seng. Ngin sa nang iai buddien bha ia kane ka kam,” u la ong.
“Ngi ladep aiti ia ka dorkhas ha u Myntri bad ka Sorkar ka don la ki jong ki jingkitkhlieh ia kaei kaba ka dei ban leh,” la iathuh u Samla Biam.
“Sngewbha wat ym kheiñ sting ia ka kam ba phi dei ban leh, kitkhia khnang ba ka lawei jong ngi ka Bri u Hynñiewtrep kan phyrnai shuh shuh,” la ong u Samla Biam.
Haba kylli, u samla Biam u la kynnoh ba une u nonghikai um shym la thung bujli ban hikai ha ka jaka jong u wat haba u pep skul.
U la iathuh ba u Bah Wikiru u la ioh ia ka kam hikai ha Lower Primary, Larnai ha u snem 2013 bad ha u snem 2017 u la shah sospon bad u la bteng biang ia ka kam hikai hynrei haduh mynta wat lada u dang dei u nonghikai hynrei ym shym la leit satia ia ka kam hikai skul.
Shuh shuh u la ong ba ka KSU kaba don ia ki shnat treikam ha ki district bapher bapher kan dang iai buddien ia kine ki jait kam bad lada lap ka seng kan ujor beit sha ka Sorkar.
