Amlarem, Risaw 06: Hadien ka jingud jingnam jong ki Khynnah skul bad ki nong shong shnong ka thaiñ ka Khasi Students Union War Jaintia Circle (KSU) ha ka sngi Thohdieng hapoh ka jingialam u General Secretary samla Lurman Talang bad kiwei, ryngkat ka jingsynran lang ki nongialam ka West Jaintia Hills Distric Unit ba la lamkhmat da u General Secretary u samla Leningrad Tariang ki la leit ban jurip ia ka skul sorkar Sohkha Goverment Higher Secondary School bad ha ka jingjurip la lap ba ka skul kam don ia u nonghikai Chemistry.
Ynda lah tohkit bniah ka seng ka lap ba ka dei na ka daw ka jing pynkylla ka sorkar ba ki nonghikai kin hap ban pyndep ia ka B.Ed bad ba u nonghikai uba dei peit ia ka subjek ula leit ban bteng ia ka jingpule katkum ka jingbthah ban pyndep shwa katkum ka kyndon.
Hynrei kaba sngew lyngngoh ka long ba ka sorkar kam shym la lah ban thung bujli ia katei ka post wat hadien ba lah dep khot ban thep ia katei ka kam kaba lait.
Kaba pynsngew lyngngoh shuh shuh ia ka seng ka long ba naduh u bnai Lber kane ka skul kam don ia u Nonghikai Chemistry bad ka buh jingeh haduh katta katta ia ki samla pule jong kane ka skul.
Ka Seng ka dap da ki jing sngewbitar haba ka jia kumne ia ki samla pule kiba thrang ban poi sha khmat ha baroh ki liang khamtam lei lei mynta ka lah dei sa ka por ba kin thoh ia ka eksamin Pre-Selection bad ka Selection bad ruh ban pynkhreh sa kiwei pat ki eksamin. Na ka liang jong ka seng kan iai buddien halor kane ka kam.
Ka Seng ka la kren shai ba lada kine ki Khynnah pule jong kane ka skul kim lah ban ioh ia ka jinghikai kaba biang kumno ka sorkar Kan pyrkhat na ka bynta ka jong ki?
Ka sorkar ka dei ban shim ia ka jingkitkhlieh bad ban wad ki lad ki lynti khnang ba ki khynnah pule kin ioh ia ka jinghikai kaba tikna shwa ba kin pynkhreh ia lade ban thoh ia ki Eksamin ki jong ki.
