Shillong, Naiwieng 04: Ki Pulit jong ka Laban Police Station haduh mynta kim pat kem satia ia u Suresh Singh uba la dung pynmynsaw da ka tari ia ka kurim lajong ka Poonam Singh ha ka 31 tarik u Risaw, 2023 ha iing sah ha Laban, kaba la mynsaw jur bad kaba dang shah sumar haduh mynta ha Hospital.
Ka Khun kynthei jong ka Poonam Singh, ka Deviani Singh ha ka jingiakren bad ki lad pathai khubor ha sngi Saitjaiñ ka la kren diaw ia ka jingshim sting jong ki Pulit bad ka jingbym kem ia u Kpa jong ka, wat hadien ba la mudui da ka ejahar.
Ka Deviani Singh ka la kynnoh ba kane ka jingshim sting jong ki Pulit ka long namarba u kpa jong ka, u Suresh Singh uba dei u Director jong ka Shillong Golf Club, u dei uba don ka jingiadei bad ki briew kiba don ha ka bor.
Ha ka ejahar ba ka Poonam Singh ka la mudui sha ki Pulit ka Laban Police Station ka la ong, “hynne ka step (sngi baar) nga la phah ia la u kurim ba un leit ban siew katto katne ki jingsiew na ka bynta ka khun jong nga. U la kyntait da kaba ong ba um don pisa, ha kaba kum kane ka khep nga la ong; “phi don pisa ban pynlut na ka bynta ka Bala bad pynairong airup ia ka iing jong ka hynrei phim don pisa na ka bynta jong ngi.” Kumta ka la mih ka jingiania kaba jur bad u la dung ia nga da ka tari bad thombor ia nga na ki bynta jong ki lbong bad pynmynsaw ia ki shympriah kti jong nga. Nga la sdang ban lynñiar bad ka khun jong nga ka la wan mareh bad iohi ba nga la phlei snam. Hadien kane nga la pyntip noh sha ki Pulit kiba la pynkit noh ia nga sha Hospital na ka bynta ban ioh jingsumar,” ong ka Poonam ha ka ejahar.
Ka Deviani Singh ka pynpaw ba ka kwah ba ki bor jong ka aiñ kin ai ia ka hok jong ka kmie kaba la shah thombor bad kaba dang don mynta ha ka jingshah sumar ha Hospital.
Ka la kynnoh ruh ba kane kam dei satia ka sien banyngkong hynrei u Suresh Singh u ju thombor ruh ia la ka jong ka kurim ha ki snem kiba mynshwa bad ki la don teng ruh ki ejahar ba la mudui pyrshah ia u hynrei ki Pulit kim shym la leh eiei pyrshah ia u.
“Ha ka sngi ba u la dung da ka tari ia i mei, u la phet na iing, hynrei ha ka sngi kaba bud u la wan phai bad rung hapoh iing bad nga iohi ia kata namarba nga ieng habar. Nga la pyntip sha ki Pulit ba i pa i don ha ing ba kin wan kem hynrei ki Pulit ki la ong pynban ba ki donkam da ka jingthoh na u Officer in Charge bad kim wan hi ruh. Nga la telephone ia u Officer Incharge, um shim satia ia ka phone watla ka ring bad ha ka por 7 baje janmiet ynda nga leit mih sha Police Station ban tohkit. Hynrei ha ka por mynmiet u OC u la telephone ia nga ban ym leh eiei. Ia mynta nga kwah ba ia kane ka Case dei ban aiti noh shawei kaba u kpa jong nga um don jingiadei eiei,” la ong ka Deviani Singh.
