Mawkyrwat, ïaïong, 22: Ar ngut ki khynnah kynthei na ka shnong Wahsiej, ki la ngam jyllop ha kawei ka wah ba la tip kyrteng kum ka thwei Breimeirit, ha Wah Rilang, South West Khasi Hills District kaba jngai kumba 7 kilometre tam eiei na Mawkyrwat.
Ka tyllong khubor ba la iohlum na ki Pulit, ka iathuh ba kane ka la jia ha ka sngi u Blei ha ka por kumba 2:00 baje ne 2:30 baje nohphai sngi katba kine ki ar ngut ki khynnah kynthei ki dang ia ingi ha thwei Breimeirit, Wah Rilang.
Ia ki ar ngut ki khynnah kynthei kiba la ngam jyllop la tip kyrteng kum ka Shabakmenlang Wanniang, 16 snem ka rta bad ka Aishabankmen Thongni, 14 snem ka rta.
Haba tohkit ha kane hi ka jaka, la ong ba halor ka jingiap jong ki ym don ka jingsuba sniew ïano iano ruh bad na ka liang ki bahaiing hasem ki la kyrpad ban pyllait ia ka Postmortem ha kaba ka kong Y.R. Mawlong, Additional Deputy Commissioner, South West Khasi Hills District ka la ai ia ka jingmynjur.
Ia ka met basah jong kine ki ar ngut la aiti noh sha ki bahaiing hasem ba kin pyndep ia ka jinglehniam bakhatduh.
