Shillong, ïaïong, 08: Uwei u rangbah na ka shnong Klew, Ri Bhoi District u la duhei ia la ka jong ka jingim katba u dang thmu ban leit khwai sha ha wah Umñiuh Khwan hajan ka Union Christian College (UCC), hadien ba u la ngam jyllop bad khlad noh tang hadien ba u la ioh ban pyllait im ia la u jong u khun.
Ia une u rangbah la tip kyrteng kum u Bah Mahamsing Sten, 38 snem ka rta bad kane la jia ha ka sngi u Blei. Ia ka met jong une u rangbah la ioh ban sei noh ha ka step Lah Sngi u Blei da ka kynhun State Disaster Response Force (SDRF) bad ka jingiarap lem jong ki paidbah nongshong shnong.
Katkum ka jingtip ba la iohlum la iathuh ba ki don phra ngut baroh kiba thmu ban leit khwai dohkha ha Umñiuh Khwan bad kawei ka lieng kaba shong saw ngut ki briew ka la lait bad ka lieng kaba shong u Bah Mahamsing ka dang don hapdeng bad namar ka jingjur shaba palat ka lyer kane ka lieng ba ki shong ka la ngam shapoh um.
Ha kane ka jingjia, katkum ka jingiathuh jong ki briew, la ong ba une u rangbah hadien ba la ngam ka lieng ha um da shilliang kti u rah ia la u khun shajrong ka sla um bad hadien ba u la lah ban pyllait im ia u khun u la ngam jyllop ialade bad duh syndon ia la ka jong ka jingim.
