Shillong, Ïaïong 08: Kumba 527 ngut ki khynnah na kylleng ki district jong ka Jylla ki la iashim bynta ha ka jingwad khynnah ïalehkai lane ka Talent Hunt Program kaba hap hapoh ka Khelo India Rising Talent Hunt (KIRTI-MyBharat).
Ïa kane ka prokram ba la pynlong ha Sports Authority India (SAI) Training Centre, Shillong la sdang ha ka Lah Sngi u Blei yn sa pynkut noh ha ka sngi Balang mynta ka taiew.
Ki jingïalehkai ki kynthup ïa ka Athletics, Boxing bad ka Football. Ki khynnah kiba wan ïashim bynta ha ka jingïalehkai Athletic ki don 141 ngut, 55 ngut ha ka Boxing bad 331 ngut ha ka Football.
Ka jingthmu jong ka tnat ïalehkai jong ka Sorkar Pdeng ka long ban ithuh ïa ki sap kyrpang jong ki khynnah bad ban ai jinghikai pura ïa ki lyngba ka jingdon ïa ki jaka ïalehkai kiba paka namar ka jingangnud ka long ban sei ïa ki khynnah ïalehkai ki ban paw haduh ki lympung ïalehkai shabar ri kum ha ka Olympic bad kiwei kiwei ki rynsan ialehkai.
Ha kane ka sngi la sdang da ka jingpynrung kyrteng ïa baroh ki khynnah kiba la wan sha kane ka prokram ha la ki jong ki rta ki jong ki, hadien la bud sa ka jingthew jingkhia, ka jingthew ïa ka rynïeng bad kumjuh ia kiwei ki test, nalor ka jingpynmareh, ka jingkynthih, ka jingkawang bol da dien (back throw), ki jingïalehkai phutbol, boxing bad athletics.
U Assistant Director jong ka SAI, STC, Shillong u T.S Chavhan u la pynpaw ba kane ka prokram ka dei lyngba ka jingshim khia da ka tnat Sports & Youth Affairs jong ka Sorkar Pdeng na ka bynta ban ithuh ïa ki sap ïalehkai ba kyrpang jong ki khynnah khnang ban ai jinghikai ïa ki lyngba ki jaka ïalehkai kiba paka bad ba kin ïoh pat ïa ka lad ban mihkhmat ïa ka ri India ha ki lympung ïalehkai shaba ri.
Ïa kane ka prokram la pynlong ha kylleng jong ka ri India. Ki khynnah kiba don ïa ki sap ba kyrpang ha ki jingïalehkai kin sa shah khot sha ki prokram ai jinghikai ki ban long ha ki shlem ai jinghikai jong ka SAI.
