Shillong, Jylliew, 23: Ia ka met jong u Dhrubajyoti Kalita, uba la ngam jyllop katba u dang jngi ha wah Aradonga, la lap ha ka sngi U Blei.
Ia ka met jong Dhrubajyoti Kalita uba la 21 snem ka rta la lap na ka jaka bam khana ha ka shnong Mawkhrang kaba don ha khappud ka jylla Assam-Meghalaya hadien ka jingwad shitom da ki Pulit ka Meghalaya bad ka Search & Rescue Team (SRT) na Meghalaya.
U Kalita, ryngkat bad saw ngut ki paralok na ka shnong Milanpur kaba hap hapoh ka Chayagaon Police Station, Kamrup district, ki la leit bam khana ha katei ka jaka ha ka sngi Saitjaiñ. Kane ka kynhun ka la leit jngi ha wah Aradonga, ha kaba u Kalita u la ngam jyllop.
