Shillong, Lber, 21: Ki Pulit jong ka Ribhoi District ha ka sngi Palei ki la pyllait paidbah ia kawei ka video ba la ring dur ia ka jingiakren da ka mobile phone hapdeng u Military Commander ka seng kieng atiar Hynniewtrep National Liberation Council (HNLC) uba la tip kyrteng kum u Sanbor Pala bad uwei na kiba la shah kem ha ka jingioh kurup ia u bom IED ha Ribhoi dang shen.
Katkum u kyrwoh ba la phah da u Superintendent of Police jong ka Ribhoi u Jagpal Singh Dhanoa, ki Pulit kiba la pynlong ia ka jingtohkit halor ka case ba la register ha Nongpoh Police Station hapoh ka Section 120B/121A Indian Penal Code, Section 10/13/18 UA(P) Act bad ka Sec 5/6 Explosives Substance Act. Sa arngut ki briew ki la shah kem ha ki Pulit jong ka Ribhoi bad ha ka jingtohkit, ki Pulit ki la lap ba ka seng HNLC ka donkti ban pynngop ia ki samla kiba lui lui ban leh ia ki kam pyntriem da kaba buh hakhmat ia ka thong ban pyntyllun shakhmat ia ka jingdawa pisa.
Ki Pulit ki la pynlong ruh ia ka jingtohkit kaba bniah ban lap ksai la ki don ne em ki briew kiba la siew pisa sha kane ka seng kieng atiar bad ki Pulit ki la maham ruh ba lada kino kino ki briew ki don jingiadei kin shah kem bad shah tohkit bad yn pynngat beit hapoh ki kyndon jong ka Unlawful Activities Prevention Act.
Shuh shuh u SP u la iathuh ba ki Pulit ki la register case ha kaba iadei bad ka jingsieh ia ka lama jong ka seng HNLC ha surokbah National Highway ha Ribhoi District ha u Nailar, 2023 bad ia kane ka case la register ha Nongpoh Police Station hapoh ka Section 120B/121A jong ka Indian Penal Code bad ka Section 10/13 jong ka UA(P)Act.
Ha kajuh ka por, une u heh Pulit ka Ribhoi u la iathuh ba ia ki kam runar jong ka HNLC la tohkit bniah lyngba ka Social Media bad na ka VO1P. U SP u la kyntu ia kino kino ki briew lada ki ioh phone call na ka HNLC ki dei ban pyntip mardor sha ki Pulit bad ban khang noh ia ka dur bad ia u nombar ba la iakren. U SP u la ong ba la lada lap ia kino kino ki briew kiba don jingiadei bad ka seng HNLC yn kem bad ban pyngngat ha ki kyndon ain kiba eh.
