Shillong, Lber, 16: Ki samla kiba ju kamai jakpoh da ki thuk thuk shimet ban kit ia ki nongleit jingleit kylleng ka sor Shillong ha ka sngi Saitjaiñ ki la iakynduh lang ha madan Malki, Shillong ban shim rai kumno ban leh nangne shakhmat hadien ba la mih ka jingkhanglad ban kamai be-ain khlem da ka ioh ia ka Permit bad siew Khajna sha ka tnat Transports jong ka Sorkar Jylla.
Ha ka sngi Thohdieng u Commisisoner jong ka tnat Transports Bah E. Kharmalki ha ka jingiakren bad ki nongthoh khubor u la maham ia ki paidbah ba kin hap ban shim hi ia la ka jong ka jingkitkhlieh lada ki leit jingleit ne shong da ki Bike Taxi jong ka Rapido ne jong ki nongniah Scooty shimet bym pat ioh Permit na ka tnat Transports ka Sorkar Jylla.
Ha ka jingiakren bad ki lad pathai khubor, u President ka Ride to Serve Bah K. Nongkynrih u la ong, “ia ka jingkhein be-ain ngim sngew eiei namarba ngim dei ki khynnah kiba tuh na iing na sem bad nangne nangtai hynrei ka dei ka jaka kpoh jong ngi shimet bad ngi im da ka ki jong ki kti ki kjat. Ngi baroh ngi la rai beit ban kamai.”
“Ha ka taiew ban sa wan ngin sa leit ban iakynduh ia u Myntri ka tnat Transports ban iakren halor kane,” ong u Bah Nongkynrih.
“Ngi la ai da ka jingthoh sha ka Sorkar naduh u snem baladep, hynrei haduh mynta ka Sorkar kam shym la jubab ia ka jingthoh,” u la ong.
Ha ka 1 tarik, Nailur, 2023 ka Ride to Serve ka la aiti da ka shithi ha u Symbud Myntri Rangbah ka Jylla Bah Prestone Tynsong ban ai Permit bad siew khajna khlem da pyniasoh bad ki Aggregator kiba don hapoh kane ka jylla.
Haduh mynta, ka JETS 24×7 kaba don ia ka Permit ka dei ka Aggregator ba nyngkong eh ha Meghalaya ban shakri ia ki paidbah lyngba ki Bike Taxi.
“Ka ophis u DTO ka la pyllait ia ka Permit hynrei ngi kiba kamai ynda ngi leit shim ia ka Permit ki ong ba ngi hap ban pyniasoh bad kiwei ki Kompeni. Ha ka jingthoh ba ngi la aiti ha u Myntri ka tnat Transports ngi la pynpaw ba ngi kwah ban siew ia ka Permit bad siew khajna lyngba ka Sorkar bad ngim kwah ban leit lyngba jong kino kino ki kompeni,” ong u Bah Nongkynrih bad bynrap, “ngi kwah ban long ki nongkamai shimet bad iohnong sha lade.”
Haba kylli, u la ong, “ngim dei kiba kamai bad ka Rapido. Ngi kamai da ka Scooty shimet bad dei na kata ka daw ngi sa ieng Offline bad ngi khlem pyndonkam ia uno uno u App. Lada ngi siew ia ka bai permit bad ka khajna sha ka Sorkar ngi hap ban siew sa ia ka bai App sha ki kompeni namarba ki ohdor ia ka bai kamai shi khlieh briew.
Katkum ka jingiathuh jong u Bah Nongkynrih, ki don 300 ngut tam kiba kamai shimet da ka Scooty.
