Shillong, Risaw, 13: Ka Myntri ka Koit ka Khiah jong ka Sorkar Jylla ka Dr. Ampareen Lyngdoh ka la rai ban leit sorjamin hi dalade ban lap ia ki jingduna jong ki jaka sumar paidbah ha ka thain War Jaintia hadien ba la ioh ia ka jingujor na ka Hynñiewtrep Youth Council War Jaintia Council ha ka sngi Thohdieng.
Ka Hynñiewtrep Youth Council (HYC) War Jaintia Council ka la aiti da ka dorkhas ha ka Myntri ka tnad ka Koit ka Khiah jong ka Sorkar Jylla ka Dr. Ampareen Lyngdoh ban dawa ia ka sorkar ban kyntiew kyrdan bad ban maramot noh ia ka Primary Health Centre kaba don ha ka shnong Pdengshakap, ha Jaraiñ bad ha ka shnong Dawki bad kumjuh ruh ia ka State Dispensary kaba don ha ka shnong Padu bad ia ka community Health Center (CHC) kaba don ha ka shnong Nongtalang kaba hap hapoh ka Amlarem Civil sub-division.
Ha ka jingiakren bad ki lad pathai khubor u President jong ka seng u Bah u Tohmondiam Mukhim u la ong ba ka seng ka la lap ba ki don shibun ki jingduna haba ki dkhot jong ka seng ki la leit ban wad jingtip bad leit jurip ia kine ki jaka ai jingsumar kiba dang hap hapoh ka Amlarem Civisl Sub-division.
U Bah Mukhim u la iathuh ba ka Myntri ka koit ka khiah ka la kubur ban shimkhia ia kane ka jingpyngew jong ka seng bad ha ka 14 tarik mynta u bnai Risaw, 2023 kan sa leit sorjamin hi dalade ia ka jinglong jingman jong kine ki jaka ai jingsumar khnang ban lap da la ki jong ki khmat.
