Shillong, Rymphang, 23: U Bah Prestone Tynsong uba long u Symbud Myntri Rangbah ka Jylla uba khmih ia ka tnat Kam Pohing u la ong ba ka Sorkar kan ym ailad daleilei ruh em ia ka Garo National Liberation Army-R (Re-group) ba kan khie khlieh biang sa shisien pat namarba ka tnat Pulit bad ki tnat syntiat ki long kiba peitngor bha ban pynthikna ba kane ka kynhun kaba la leh ia ki kam pyntriem ha ki snem ba mynshwa ha Rilum Garo kan ym don lynti ban leh biang sa shisien ia kine ki kam runar kiba pynshong syier mynsiem ia ki paidbah ka rilum Garo.
Kane ka jingpynshai jong u Symbud Myntri ka tnat Kam Pohing ka long hadien ba ka shithi jong ka Garo National Liberation Army-R (Re-group) ba la soi da u Geora Pantora Sangma kum u Chairman ka la saphriang ha ka social Media ha kine ki khyndiat sngi bad poi ruh sha ki tyndong shkor jong ka Sorkar Jylla.
U la ong ba ki Pulit kim pat tip la ka khubor halor ka GNLA-R ka dei kaba shisha ne kaba thok.
“Baroh arphew saw kynta, ki Pulit ki long kiba la khreh bad ngin ym ailad ia kum kine ki jait kam, la ka dei tang ka khubor ne la ka dei tang ka jingthmu jong ki katto katne ngut ki briew ne ki lah ban dei tang ki samla shynrang kiba kwah ban im ka jingim kaba pahuh pahai da kaba thaw ia ka kynhun bathymmai. Ngi long kiba peit ngor bad ngin ym thiah ym dem bad ngin pynthikna ba kum kata ka jingpynthymmai ia ka kynhun kam dei ban jia,” la ong u Bah Tynsong.
U la ong ba ka tnat syntiat jong ki pulit ka dei kaba khlain. “Namarkata, sngewbha ieh ia kata ha ngi, bad ngan pynthikna kumba nga la ong ba ka jingpynim biang ia ka kynhun kan ym jia bad ngin ailad satia ia kata ba kan jia,” u la bynrap.
