Shillong, Naitung, 06: Ka Jaiñtia Students’ Union (JSU) ka la pynpaw ka jingpyrshah kaba jur ïa ka jingthmu jong ka Sorkar ban wanrah ïa ka lynti Rel ha rilum Jaiñtia. Ka jingpyrshah jong ka JSU ka long tang hadien khyndiat kynta ba u Myntri Rangbah ka Jylla u Conrad K. Sangma ha ka sngi Palei u la ïathuh ba ka la don ka jingsdang wad bniah ban pynsdang noh ïa ka lynti Rel haduh Khliehriat, East Jaiñtia Hills District.
Ha u kyrwoh, ka JSU ka la dawa ïa u Myntri Rangbah ban wanrah da ki kam pynroi ba kyntiew ïa ka pule puthi, ki hospital, bad ki surok kiba bha ha rilum Jaiñtia bad ban pyntreikam ruh da ka Inner Line Permit (ILP) kaba long ka mat kaba hakhmat eh jong ka Sorkar.
“Pyntreikam da ka ILP, shna da ki surok kiba bha, wanrah da ki skul kiba bha bad ki jaka sumar kiba bha, ngin sa lah ban pdiang ïa ka lynti ha rilum Jaiñtia,” la ong u kyrwoh
“Ngi sngewthuh ba ka jingpynïasoh da ka lynti Rel ka wanrah bun ki jingmyntoi naduh kaba pynsuk ïa ka leit ka wan, ka jingkyntiew ïa ka ïoh ka kot bad ka pynïajan ruh ïa ka leit ka wan bad kiwei ki jylla hynrei ka jylla kaba rit kum ka Meghalaya kaba la buhai shnong kham bun da ki riewlum, ka donkam eh ïa ka Sorkar ban pyntreikam nyngkong shwa da ka Inner Line Permit (ILP) ha ka jylla namarba kane ka jingthmu ka long ban pyrkhing da ka aiñ ka jingwanrung laitluid jong ki briew kiba nabar ban ïada ïa ka riti ka dustur jong ki trai shnong ha ka jylla, ïa ki marpohkhyndew bad ka jingbun briew jong ka thaiñ,” la bynrap ka JSU.
U kyrwoh u la ong shuh shuh ba ka JSU kam len ïa ka jingshisha ba ka rilum Jaiñtia ka donkam ïa ka Rel. “Ngi angnud ban pyntreikam shwa ïa ka ILP ban khang ïa ka jingwanrung be-aiñ jong ki briew kiba nabar bad ban phaikhmat shwa sha ka pule ka puthi, ka jingshna ïa ki jaka sumar kiba bha, ki surok kiba bha, ïa kiba ngi ngeit ba ki dei ki jingdonkam ba hakhmat eh jong ki paidbah ka thaiñ,” la bynrap u kyrwoh.
