Shillong, Naitung 06: Ka ophis jong ka Deputy Commissioner, East Khasi Hills District, ka la kyrpad ia baroh ki paidbah kiba ladep shondur Megha Health Insurance Scheme (MHIS) ne Smart Card jong ka East Khasi Hills District ba kin pyniasoh ia u Aadhaar Number bad ka MHIS Card.
Ka MHIS ka la sdang ha u snem 2013 bad naduh kato ka por, ka la ai jingmyntoi ia ki paidbah jong ka District bad ka jylla hi baroh kawei da ka jngiarap ha kaba siew lang ia ka bailut baisep haba leit shah sumar sukher ha ki hospital khamtam ia ki briew kiba duk jong ka district.
Kane ka skhim mynta ka la ai jingiarap haduh T. 5,30,000 kawei kawei ka longing. Ki don da ki hajar ki longing kiba lah ioh jingmyntoi na kane ka skhim. Hynrei mynta kim lah shuh ban ioh ia ka jingmyntoi na ka skhim lada kim pyniasoh (link) ia u Aadhaar bad ka MHIS Card.
“Kumta la kyrpad ia phi baroh ryngkat lang ki bahaing hasem jong phi kiba la don ia u Aadhaar Card bad ka MHIS, ba phin wan shakhmat ban pyniasoh ne link ia u Aadhaar bad ka MHIS (smart card) jong phi khnang ba phin ym duh ia ki jingmyntoi jong ka skhim. La kyrpad ba phin wan noh kloi bad ba phin ym dier than shuh khnang ba phi lah ban ioh jingmyntoi ha ka por ba biang,” ong u kyrwoh na ka Deputy Commissioner ka Kong R.M. Kurbah.
“Ngi don ka jingkitkhlieh ia phi bad ia ka longing longsem jong phi bad ngi kwah ban iarap ia phi khnang ba ma phi bad ki bahaing jong phi phin ioh ia ki jingmyntoi kiba dei ka hok jong phi,” bynrap u kyrwoh.
“Phi lah ban leit sha ki ophis jong ka Block ne ha ki CHC/PHC ba don hajan jong phi ban pyniasnoh (link) ia ka MHIS bad ka Aadhaar card,” ong shuh shuh u kyrwoh.
