Shillong, K’lyngkot, 03: Ka District Magistrate jong ka East Khasi Hills District ka Kong RM Kurbah ha ka sngi Thohdieng ka la pynjari da ka Section 163 BNSS hadien ba la ïoh jingtip ba ka don ka jingïakynad hapdeng ki ar kynhun ba la ïapait jong ka Balang Presbyterian ha ka shnong Ksehpyndeng, kaba hap hapoh ka Maryngkneng Police Station.
Ha ka hukum ba la pynjari, ka District Magistrate ka la pyntip, ba ka kynhun ba thymmai jong ka Balang ka la thmu ban pynbaptis biang sa shisien ïa ki nongshong shnong ba la rim hapoh ka dong ha ka sngi u Blei ban sa wan bad ïa kane ka jingthmu la ieng pyrshah da ka kynhun kaba pyrshah.
“Lada ailad ïa kane, ka lah ban lam sha ka jingïakynad kaba lah ban pynthud ïa ka shongsuk shongsaiñ,” ong ka hukum.
“Nga pynjari da ka jingmana hapoh ka Section 163 BNSS….. bad la mana ruh ban ïalum paidbah ha ka jaka ba ïakynad. Kino kino kiba pynkheiñ ïa kane ka hukum kin shah pynshitom hapoh ka Section 223 jong ka BNS. Namar ka jinglong kyrkieh jong ka kam, kane ka hukum kan treikam noh mardor tad haduh ban da pynbna da kumwei pat,” la pyntip ka District Magistrate ha ka hukum.
