Shillong, Naiwieng 21: Ki dkhot jong ka Hynñiewtrep National Youth Movement (HNYM) kiba thmu ban hiar sha ka shnong Majai ha ka sngi baar ki la shah pakhang lynti ha ki Pulit jong ka Sohra Police Station bad ha ki Magistrate jong ka Sohra Civil Sub-division ha Umstew, ka jaka kaba don hapdeng ka shnong Laitryngew shwa ban poi sha Sohra.
Ha ka jingiakren bad ka BatesiTV, u Vice President jong ka Seng u Bah Marshall Nonglait u la iathuh ba kane ka jingthmu jong ka Seng ban hiar sha ka shnong Majai ka long hadien ba ka la don ka jingkynnoh ba ki mynder na ka ri Bangladesh ki la pynkheiñ ia ka hukum jong ka Ingbishar Meghalaya High Court kaba mana ia ki trok ban kit palat 12 ton shaneng hynrei, katkum ka jingtip ba ka seng ka la ioh pdiang, la iathuh ba ki bor synshar district kim shym la leh eiei watla ki trok kit mawshun jong ki mynder na ka ri Bangladesh ki kit ia u mawshun 20-24 ton kaba pynlong ia ka Sorkar ban duhei ia ka jingioh lum khajna.
“Da ka jingtuklar jong ki Magistrate, na ka liang jong u Commissioner and Secretary ka tnat Transports u la kyrpad ia ngi ban iakren hapoh ka ophis treikam jong u halor kane ka kam shwa ba ka seng kan shim ia kano kano ka rai,” la ong u Bah Nonglait.
“Kumba ka long ka jingiakren ka dang iaid bad lada u Commissioner and Secretary jong ka tnat Transports u lah ban pynbha ka la bha syndon bad lada um lah ban pynbha bad lada ngi ioh ia ka jingtip ba ka jingiakren kam long ngin tur beit shathie (sha Majai) ka mat jia eiei ngin ym khuslai ia kata,” la byrngem u Bah Nonglait.
Haba iathuh bniah ia kane ka jingthmu jong ka seng ban hiar sha Majai, u Bah Nonglait u la ong, “shibun tylli ki shithi ngi ladep aiti sha ki tnat treikam bapher bapher ha kaba iadei bad ka Majai namarba bun ki kam be-ain kiba don ha Majai. Katkum ka hukum ba la pynmih da ka Iingbishar Meghalaya High Court la shah ban kit tang 12 ton u mawshun. Hynrei ha Majai ki kit palat 22, 23,24 ton.”
“Ka seng ka ladep mudui da ka ejahar ha u bnai Jymmang 2023. Ka jingkit palat pud ka long ka jingduhnong ia ka jylla. Ka Sorkar ka duh ia ka khajna. Na ka liang ka seng ngin ym shongthait namarba ka ejahar ba ngi la ujor kam shym la treikam satia bad ki trok ki iaid beit kumba ju long manla ka sngi,” la ong u Bah Marshall.
U la kynnoh ruh ba ha ka shnong Majai, ka shnong kaba don markhap bad ka ri Bangladesh, ki kot ki sla jong ki trok kit maw jong ki bar jylla ki long ki bym biang satia bad kynnoh ruh ba ka jingleh Benami ruh ka long kaba shyrkhei bha hapdeng ki mynder ri na ka ri Bangladesh bad ki Khasi kiba sah ha ka shnong Majai.
“Manla ka thliew iing ki don beit ia ki Sticker. U mynder ri (na Bangladesh) u thied ha ka dor T. 8 -10 hajar kawei ka Sticker ban ioh mar. U briew (trai jylla) ioh beit thik tang ka bai Sticker kaba T.8-10 hajar katba ka kamai kajih ka dei beit na ka bynta ki nongkhaii maw na Bangladesh,” la kynnoh u Bah Nonglait.
“Kane kaei kaei kaba pynsngewkhia ia ka seng namarba ka pynduhnong ia ka khajna jong ka jylla. Sa bun ki kam be-aiñ ban pynriewspah ia ki poiei bar-ri,” u la ong.
Na ka liang jong u Magistrate ka Sohra Civil Sub-division u Bah R. Kharbihkhiew u la ong ba ka jingbat ia ki dkhot ka HNYM ha Umstew ka long ban khanglad ioh ka mih kano kano ka jingjia ba sngewsih lada ailad ba kin hiar sha ka shnong Majai.
