Shillong, Jymmang 06: U Myntri ka tnat Disaster Management ka Sorkar Jylla Bah Kyrmen Shylla ha ka 6 tarik, Jymmang, 2024 u la iathuh ba ka jingther jong u Lapbah, u phria bad ka jingbeh kyrthep jong ka erïong ha ka janmiet sngi U Blei ka 5 tarik Jymmang, 2024 ka la pynjulor haduh 483 tylli ki iing bad palat 29 tylli ki Community and Rural Development Block ki la shah ktah hapoh ka Jylla myghalaya baroh kawei.
Ha ka jingiakren bad ki lad pathai khubor u la iathuh ba katkum ka jingkheiñ ba la ai da ka State Disaster Management Authority, la pyntip ba artylli ki iingskul ki la shah jynrat ha Eastern West Khasi Hills bad kawei ka tnum jong ka iingmane ka la shah rong ha Wapung, East Jaiñtia Hills.
Ka jingdon jong ki briew kiba la shah ktah ha kane ka jingwan hap u phria, u slap bad ka erïong, ka la kot sha ka 949 ngut ha baroh kawei ka Jylla.
U Myntri u la iathuh ba ka SDMA ka pyntip ba lai tylli ki C&RD Block kiba la shah ktah ha ka jinglynshop ka erïong bad u slap uba jur ki long ka Mawryngkneng, ka Mawkynrew bad ka Mawphlang Block.
U la ong ba ha Mawryngkneng Block, kawei ka Shnong ka la shah ktah na ka eriong bad haduh 21 tylli ki iing ki la shah pynjulor. Katba ha Mawphlang Block ka la mad ïa u lapbah uba la pynjulor ïa lai tylli ki Ïing.
Shuh shuh u la pyntip ba katkum ka kaiphod jong ka SDMA la shem ba ka jingpynjulor kaba jur eh ka long ha Eastern West Khasi Hills na ka jinglynshop jong u u phria bad ka jingwan ka erïong eriong ha kaba haduh 14 tylli ki shnong ki la shah ktah bad haduh 69 tylli ki iing ki la shah pynjulor kynthup ruh artylli ki iingskul ki la shah pynjulor ha ka erïong bad u phria. U la ïathuh ba haduh 413 ngut ki briew ki la shah ktah ha kane ka District bad haduh 50 hectare ki jaka rep ki la shah pynjulor.
Ka Nongstoiñ Block ruh ka la shah ktah jur bha ha u phria bad ka erïong ha kaba haduh 52 tylli ki iing ki la shah pynjulor bad haduh 250 ngut ki briew kila shah ktah.
Katba ha Mawshynrut Block, ka erïong ka la lynshop jur ha kawei ka shnong bad ki don haduh 11 tylli ki iing ba shah pynjulor bad 57 ngut ki briew kila shah ktah.
Ha West Jaintia District ka la mad ïa ka jinglynshop jong ka erïong bad artylli ki Block kiba la shah ktah ha ka jingwan ka eriong bad kine ki dei ka Thadlaskeiñ bad Amlarem Block. Ha Thadlaskeiñ, 2 tylli ki Shnong kila shah ktah bad 4 tylli ki Ïing kila shah pynjulor katba ha Amlarem pat, tang kawei ka shnong ka la shah ktah bad kawei ka Ïing kala shah pynjulor.
Ha East Jaiñtia Hills District, u lapbah u la wanrah ïa ki jingjulor ha ki artylli ki Block ba kynthup ïa ka Wapung bad Saipung Block. Ha Wapung Block, kawei ka Shnong ka la shah lynshop jur eh bad 2 tylli ki Ïing bad kawei ka Ïingmane ki la shah pynjulor bad 18 ngut ki briew kila shah ktah.
Ha Saipung Block, tang kawei ka Ïing ka la shah pynjulor bad 7 ngut ki briew kila shah ktah. Ïa ki briew ba shah ktah la pynkynriah noh sha ki ïing jong ki bahaïing hasem.
Ha rilum Garo, ka jinghab phria kaba jur eh ka dei ha Baghmara Block, South Garo Hills bad ha kane ka thaiñ, haduh 282 tylli ki Ïing ki la shah pynjulor hynrei ha Chokpot pat, ka la syllad ka erïong haduh ba 10 tylli ki Ïing ki la shah pynjulor bad 42 ngut ki briew ki la shah ktah.
Ka SDMA ka la bthah ïa baroh ki District Disaster Mangement Officer ban shim ïa ki sienjam ban leit ai jingïarap ïa ki briew kiba shah ktah.
Na ka liang jong u Myntri Rangbah Conrad Sangma u la iathuh ba u la bthah ia ki bor synshar distrik ba kin phah ia ki lad jingiarap bad ban sam ia ki tin sop iing sha ki longing ba la shah ktah.
“Katkum ki kyndon la shah ban sam ia u khaw bad ki marbam. Ngi la pynkylla ia ki kyndon bad mynta ki Deputy Commissioner, khlem ka jingpan jingmynjur na ka Sorkar ki lah ban sam wat ia ki tin sop ing,” ong u Sangma.
