Shillong, Risaw 09: Ka Khasi Hills Autonomous District Council (KHADC) ka la pan jingiarap na ka World Bank ban weng ia ka jingjaboh ha ki san tylli ki distrik kiba hap hapoh u pud u sam jong ka Council.
U Chief Executive Member (CEM) jong ka Council u Bah Pynïaid Sing Syiem, u la iathuh ba ka Council shen kan sa phah ia ka Detailed Plan of Action ban pyntreikam ia ka Solid Waste Management Programme, katkum ka Solid Waste Management Act, 2020 na ka bynta ban ioh jingkyrshan pisa na ka World Bank.
Ha kaba iadei bad kane, ka KHADC bad ki ophisar jong ka World Bank ki la shong jingialang pyrkhat kam ha ka lah sngi U Blei.
“Ngi la kyrpad ia ka World Bank ba kan ai jingiarap naduh kaba pynshai sha ki paidbah ban shna ia ki Resource Recovering Centres (RRC) ki ban iarap ban lum lang shi jaka ia ki jaboh jabaiñ ki bym pyut bad kiba pyut ha ki shnong ki thaw bad ha ki distrik,” ong u Pyniaid ha ka jingiakren bad ki lad pathai khubor.
“Kane ka thong ka long ban wanrah ia ka jingkhuid jingsuba. Ngim kwah ban pynkhuid ia ki jaboh jabaiñ tang na ki shnong lajong bad ban leit bret bad pynjaboh ia kiwei pat ki jaka,” u la ong.
U CEM u la iathuh ba ka World Bank ka la kyrpad ia ka KHADC ban leh pynstet noh mar mar ha kaba iadei bad kane ka kam, bad ong, “ka World Bank ka ladep mang lypa ia ka bhah pisa. Namarkata, ngi hap ban aiti shwa ia ka Detailed Plan of Action kumno ban pyntreikam ia ka Solid Waste Management Programme jong ka Council hapoh une u bnai.”
Halor kane, u Bah Pyniaid u la ong ba ka Council ka la rai ban iatreilang bad ki dorbar shnong ban pynsngewthuh ia ki paidbah ha ki shnong, ha ki Hima bad ha ki distrik khnang ba ki paidbah kin dup sngewthuh kumno ban lum shi jaka ia ki jaboh jabaiñ khnang ba ym pynjaboh ia ka mei-mariang kynthup ruh ia ki um ki wah. Ia ka jingpynshai paidbah yn sa pynlong ha ki skul bapher bapher bad ha ki Kolej kynthup ruh ha ki jaka iew.
Shuh shuh, u la iathuh ba ka Council ka la rai ban ithuh ia ki katto katne tylli ki jaka ban pyntreikam ia ka Pilot Project da kaba shna ia ki RRC.
Ia mynta, ka RRC ka dang don tang ha Mawlai Mawroh ha kaba ia ki jaboh jabaiñ ba la lum na ki thliew iing jong ki nongshong shnong ban pyniakhlad ia kiba jaboh kiba pyut bad ki bym pyut. Lyngba ka RRC yn sa pyntreikam biang ia ki tiar kiba dang iaid kam bad kumjuh ruh ban shna sboh na ki jaboh.
“Lada ngi jop ha kaba pyntreikam ia ka Pilot Project ha ka RRC kan pynduna ia ka jingtheh jaboh ha Marten bad kumjuh ruh kan kham pynduna khyndiat ia ka jingbret jaboh ha kane ka jaka,” u la bynrap.
U CEM u la ong ba ka Council shen kan sa buh ruh da ka dor na ka bynta ka bai lum ñiut bad ban thaw ruh ia ki kyndon ban daiñ kuna pyrshah ia kino kino kiba pynjaboh ia ka mei mariang bad bynrap, “kane kan pynthikna ba kan iada ia ki wah bad ia ki tyllong um.”
U la ong ba ka Wahumkhrah bad ka Umshyrpi ki dei ki ar tylli ki nuksa kiba la shah pynjaboh na ka daw ka jingbym lah ban tehlakam ia ka jingbret jaboh pathar.
“Ka Executive Committee bathymmai ka la kyrpad ruh ia ka World Bank ban shna ia ka Waste Processing Plant. Kane kan kham shimpor khyndiat,” u la ong.
Haba kylli, shaphang ka jingpyrshah ia ka jingthmu jong ka Sorkar ban shim jaka na ka bynta ban pynlong jaka thehñiut, u Bah Pyniaid u la ong, “ka Sorkar lada kam kren shai balei ka donkam ban wad jaka, mano ban mynjur ban ai ia ka jaka.”
Ha ka sngi Baar, ka KHADC bad ka World Bank kin sa leit jurip ruh ia ka Wah Umkhen, ia ka shnong Umpling, bad Pynthorumkhrah, ia ka RRC ha ka shnong Mawlai Mawroh bad ia ka jaka thehñiut ha Marten.
