Shillong, Risaw 09: Ka Synjuk ki Nongsynshar Shnong Par Umkhen, kaba hap ha ki lai tylli ki distrik, kata, ka East Khasi Hills, ka Ri-bhoi bad ka West Jaiñtia Hills kiba pynpaw ia ka jingpyrshah kaba jur halor ka jingthmu jong ka tnat Pynroi Sor ka Sorkar Jylla ban pynkynriah ia ka Marten na Mawiong sha u Lumsohlait ha ka shnong Nonghali.
Ka Synjuk ka la shim ia kane ka rai ha ka jingialang jong ki nongsynshar shnong ka Par Umkhen kaba la long ha ka sngi Saitjaiñ jong ka taiew baladep.
Ha u kyrwoh khubor ba la phah sha ka Batesi TV, ka Synjuk ka la dawa ia ka tnat Pynroi Sor ba ka dei ban pynsangeh noh mardor ia ka jingthmu ban pynlong ia ka jingpynsngew paidbah (Public Hearing) bad maham ruh lada ka Sorkar ka iaid pyrshah ia ka mon jong ki paidbah na ki 20 tylli tam ki shnong kiba hap hapoh ka Par Umkhen kin pynlong da ki jingiakhih kiba tyngeh.
“Ngi dap da ka jingsngewkhia kaba khraw hadien ba ngi la ioh jingtip ba ka Sorkar Jylla lyngba ka tnat Pynroi Sor ka la don ka jingthmu ban pynkynriah noh ia ka Marten na Mawiong sha ka shnong Nonghali ha u Lumsohlait,” la ong ka Synjuk.
“Ki shnong kiba pyndonkam ia ka wah Umkhen, ngi dap da ka jingsngewkhia namar katkum ka jingtip kaba shai lyngba ki dkhot kiba la poi ha kane ka jaka bad kiba la leit peit ia kato ka jaka ki iathuh ba ka jaka (ban pynlong jaka thehniut) ka don ha syndah jong ka Wah umkhen. Haduh mynta mynne, ki don ki nongshong shnong hapoh ka Par Umkhen kiba shong ha syndah jong ka Wah Umkhen ki pyndonkam ia ka um ban rep ban riang bad ban sum ban sait, wat ban dih ruh ki pyndonkam ia ka Umkhen,” la bynrap ka Synjuk.
“Ngi iohi ba kane ka jingthmu jong ka Sorkar ban wanrah ia ka Marten sha Nonghali kan ktah haduh katta katta ia ki shnong kiba marjan,” ong ka Synjuk.
Ha ka jubab ba ka Synjuk ka la ioh na ka Sorkar Jylla, la iathuh ba ka tnat Pynroi Sor ka la pynkhreh ia ka Environemental Impact Assessment (EIA) bad ia ka Environmental Management Plan (EMP). Ka Sorkar ka dang don mynta ha ka jingpynkhreh.bad lada ngi peit pat ia ka jingthmu ngi ioh ba mynta ki thmu ban wanrah beit ha Nonghali. Kane kan ktah ia ka Umkhen kaba ngi pyndonkam lut baroh..
Ka Synjuk ka la rai ban phah da ka jingthoh sha sha u Symbud Myntri Rangbah ka Jylla u Bah Sniawbhalang Dhar uba peit ruh ka tnat Pynroi Sor ban pynkut noh shisyndon ia ka jingthmu ban wanrah ia ka Marten ha Nonghali.
Shuh shuh ka Synjuk ka la shim ia ka rai ban pynlong ia ka jingialang paidbah jong ki shnong kiba kynthup ia ki 20 tylli tam ki shnong ba pyndonkam ia ka Wah Umkhen ban pynpaw ia ka jingpyrshah jur ia ka jingthmu jong ka Sorkar.
