Shillong, Rymphang, 14: Ka Hynñiewtrep Integrated Territorial Organization (HITO) ha ka sngi Balang ka la dawa ïa ka tnat Kam Pohing jong ka Sorkar Jylla ban ai jingpynshai ha kaba ïadei bad jingpynkynriahkam bad ka jingthungkam ïa ki Ophisar Pulit hapoh ka tnat Pulit.
Ka Seng ka la aiti ruh da ka dorkhas ha u Symbud Myntri Rangbah ka Jylla uba khmih ïa ka tnat Kam Pohing Bah Prestone Tynsong.
Ha ka jingïakren bad ki lad pathai khubor u President ka seng u Bah Donbok Dkhar u la ong ba ka rukom pynkynriahkam ïa ki ophisar Pulit ka ïatakhuh bad ka Transfer Act, (Meghalaya Police Act 2010).
U Bah Donbok u la ïathuh ba ka seng ka la pan da ka hok wad jingtip ne ka Right to Information (RTI) ha ka 20 tarik Nailur, 2022 ban ïoh jingpynshai halor ka rukom pynkynriahkam ïa ki ophisar Pulit ha kaba la lap ba ka don ka jingpynkheiñ ïa ka Meghalaya Police Act, 2010 namarba katkum ka jubab jong ka RTI la lap ba ki don ki ophisar Pulit kiba shu shah pynkynriahkam tang hapoh East Khasi Hills District ym duna ïa ka 15 snem khlem da shah pynkynriah ban trei sha kiwei kiwei ki district.
“Ka jubab RTI ba ka seng ka la ïoh, kam pynhun satia ha kaba ïadei bad ka jingpynkynriah kam ïa ki Pulit bad ïa ki Ophisar bad ka jubab RTI ka pynpaw ïa ka jingthmu ban tap eitmiaw ïa ki jingleh bakla,” u la ong.
“Namarba ka Sorkar ka la kam ba ka dei bud ryntih ïa ka aiñ, hynrei, ka long kaba sngewkyndit ba ka jubab ka pynpaw pyrthei ïa ka jingtap eitmiaw ïa ki jingbakla jong ki bor ba dei peit ïa ka Home (Police) haba pyntreikam ïa ka Section 12 jong ka Meghalaya Police Act 2010 kaba kdew shai halor ka samoi treikam jong ki pulit kaba ong, “Ki ophisar kiba shah thungkum ha ka kyrdan Director General of Police, Addl. Director General of Police, Law and Order; Inspectors General of Police; Range Deputy Inspectors General of Police, District Superintendents of Police, Sub-Divisional Police Officers, Circle Inspector lane Officer-inCharge jong ki Police Station ka samoi treikam jong ki ka dei ban long tang ar snem.,” la ong une u nongïalam ka HITO.
“Ngi lap ba ki don bun ngut ki ophisar Pulit kiba mynta ha ka tnat Home (Police) kiba pynkheiñ ïa ka Act 2010,” u la ong.
“Ngi kyntu jur ba ïa kane ka kam dei ban shimkhia bha namarba ngi lap ïa ki katto katne ki ophisar kiba don ha kajuh ka shuki palat ïa ka 15 snem tang da kaba shu pynkynriah kam na kawei ka Unit bad sha kawei ka Unit tang hapoh nongbah Shillong bad ha East Khasi Hills District hynrei ym sha kiwei pat ki district,” la ong u Bah Donbok.
“Ngi kyntu ïa ka Sorkar jong phi ban ai jubab halor ki jingkylli jong ngi ba balei katto katne ngut ki ophisar hapoh ka tnat Home (Police) ki don beit tang ha kajuh ka district palat 15 snem lyngba ka jingleh ba ïalam bakla jong ka Intra Unit Transfer tang hapoh kajuh ka district bad ngi dawa ba dei ban shimkhia kham kloi ïa kane ka kam katkum ki kyndon jong ka aiñ khnang ban pynthikna ba kan don ka jingtreikam kaba khuid ha ka jingai jingshakri sha ki paidbah nongshong shnong ka jylla,” la ong ka seng ha ka dorkhas ba la aiti ha u Symbud Myntri Rangbah.
