Shillong, Jymmang, 18: Ka Iingbishar Meghalaya High Court ha ka sngi Thohdieng ka la pynmih da ka notis ba la phah sha ka Sorkar Jylla bad sha kiwei kiwei ki bor ba dei peit ban ai jubab halor ka jingkynnoh ba ki don ki jingbym ryntih ha ka rta thungkam ha ka tnat Pulit ka Jylla Meghalaya.
Halor kane, ka kynhun ki samla wadkam ba la lamkhmat da ka samla Barilang Pyngrope ki la leit ujor da ka Writ Petition sha ka Iingbishar.
Ka Iingbishar ha ka sngi Thohdieng, kaba la pdiang ia ka jingpynsngew jong u L. Ngahaka u nongsaidaiñ jong ki nongujor, ka la pynmih ia ka notis.
U Muktiar jong ka Sorkar u Bah ZE Nongkynrih ka la pdiang ia ka notis ha ka kyrteng jong baroh ki nongshah ujor.
Ka Iingbishar ka la buh sngi ha ka 23 tarik myntau bnai ban shong bishar ia kane ka kam.
