Shillong, Jymmang 18: Ki riewngeit ka Balang Presbyterian Umdihar, Ribhoi District ki la iam pangnud hadien ba ka Ingmane ka la shah prong ha ki runar ki bym lah ban ithuh durkhmat ha ka miet sngi Thohdieng bad kiba la pynjot ïa ki tiar ki tar jong ka ïingmane.
Ki longkmie jong ka Jingïaseng Kynthei bad ka Christian Endeavor Society, ki nongkitkam jong ka Committee ka Balang Presbyterian Umdihar ki la iam kthang halor kane ka jingjia namraba ki tiar ki dei kiba la thied bad noh synñiang da ki longïing baduk sha ka iingmane bad sha ka miej jingkhawai u Trai.
Katkum ka jingtip ba la ïoh lum, la ïathuh ba ki runar ki la kyndang jubor ïa ka jingkhangïit da ki nar bad ynda ki la iohrung shapoh ki la leh dusmon ïa ki tiar kyntang jong ka ïingmane bad rong ruh ïa ka pisa Jingkynshew ba la noh da ki paidriewngeit jong ka Balang, ki khiew syntiew bad katto katne ki tiar ba pyndonkam na ka bynta ka jingïaseng kyrpang.
Kane ka jingshah prong tuh ha kane ka ïingmane kam dei shuh ka sien banyngkong hynrei ka dei ka jingshah prongtuh kaba la jia kumba 3 ne 4 sien.
Ha ka jingïakren bad ki lad pathai khubor, u Tymmen Basan R.B Shadap u la ïathuh ba ki la don ki briew kiba la telephone ïa u mynta ka step sngi Saitjaiñ ha kaba ki la ïathuh ba la don kiba kyndang ïa ka ïingmane bad ïa ki tiar ki tar la pharia lut sha madan.
“Ngi tang shu ioh jingtip, kumta hi marmar na ka liang ki nongïalam bad ki nongsharai Balang ngi la leit sha ïingmane ban peit ïa ka jinglong jingman bad ka jingleh dusmon ki runar,” ong u Bah Shadap.
U la pyntip ruh ba kane kam dei ka sien ba nyngkong, hynrei ka la ju jia na ka por sha ka por ha ki snem ba la leit noh.
Katkum ka jingïathuh jong u Bah Shadap, ha ki por ba la leit noh, ka la don ka jingshah tuh ki tiar ba rit ba ria ha kaba kum ki nongsharai Balang ki la shu sngap bad ki la iohkem ruh ïa ki briew kiba donkti ha kane ka kam hynrei ha kane ka kynti ba mynta kum ki nongïalam bad ki nongsharai Balang kim lah shuh ban shu sngap namarba kane ka jingjia ka la kham pher ka rukom kyndang bad rung jubor da kaba pyndonkam da ki nar bad pynpra lur ïa ki tiar ki tar bad rong ruh ïa ka synduk jong ka Bible Society ba ju lum ki jingïaseng Kynthei, ki jingïaseng Khynnahrit manla ka sngi u Blei.
“Nalor kata, ki la pynpait pynpra bad tuh ruh ïa ka pisa bad wat ki duli ba la khang tala ki la kyndang jubor da ki kynja nar bad bret ruh baroh ïa ki jinglum jingkynshew sha madan,” u la ong.
Kaba sngew lyngngoh ka long ba wat ïaki khiew syntiew baroh bad ki tiar ki tiar ba ju pyndonkam ha kaba shakri Blei ki la shim bad rong lut bad wat ki khuri dih waiñ ba ju dih ki Pastor haba ai sakramen ki runar ki la ronglut baroh.
Ka Balang Presbyterian Umdihar ka la pynrem jur bad dap da ka jingsngewkhia halor kane ka jingjia bad mynta ka Balang ka la shaniah ha ka Dorbar Shnong ban leh ïa kaba donkam ban ujor sha ki bor jong ka aiñ halor kane ka jingjia bad ban pynlong ka jingtohkit bad ban thwet ïa ki runar ba donkti ha kane ka kam.
