UJOR DA KA EJAHAR HA SADAR POLICE STATION
Shillong, ïaïong, 10: U MLA jong ka Voice of the People Party na North Shillong Constituency Bah Adelbert Nongrum ha ka sngi Balang u la kynnoh kylla ia u Symbud Myntri Rangbah ka Jylla uba peit ia ka tnat Kam Pohing Bah Prestone Tynsong ba u la ialam bakla halor ka Advertisement khot rungkam Pulit.
“Kane katba kim pat lah ban pynmih ia ka hukum lyngba ka Personel Department kam biang. Wat ialam bakla Symbud Myntri Rangbah, phi ladep mynjur ha ka Kynhun Myntri hynrei phi khlem pynmih lyngba ka Personel Department kumba long ka Office Memorandum kaba la pynmih ha ka 3 tarik, Rymphang, 2022,” ong u Bah Adelbert Nongrum ha ka jingiakren bad ki lad pathai khubor hadien ba ladep ban ujor ejahar ha Sadar Police Station.
“Kane ka dei ka bym don jingkitkhlieh jong kita kiba kam nongialam kim don ka jingkitkhlieh ia ki khun samla, khamtam ha kum kane ka por ka jingkyrduh kam,” la kynthoh u Bah Nongrum.
“Lada phi ong ba nga ialam bakla bad ngam tip ia ka ain, sngewbha ujor pyrshah ia nga da ka ejahar bad kane kam dei ka sien kaba khatduh ba ngan wan da kane ka lynti bad ka dang don sa kawei pat kaba ngan sa pynbna lada ki ophisar ki phiel namarba ka sorkar mynta kam donbor,” la kob u Bah Nongrum.
Haba buh jingkylli, u la ong, “ha ka 8 tarik, Lber, phi pyllait ia ka Advertisement bad ha ka 16 tarik, Lber ka wan ka Model Code of Conduct (MCC) bad phi leh aiu naduh ka 17 tarik, 18 tarik, 19 tarik, 20 tarik, 21 tarik bad phi ap mynta la jan shi bnai ban pan jingbit na ka Election Commission of India (ECI). Hato kane kam dei ba phi kwah ban pynduh ia ka hok jong ki khun samla ba phi kwah tang ban dep ka elekshon ba phin mynjur da ka Office Memorandum ba thymmai ba kan long ka jingduhnong kaba khraw na ka bynta ki khun samla.”
“Nga sngewthuh ba ka tnat Pulit katkum ka jingkylla jong ka por, ka lah ban pynkylla ia ka Recruitment Policy. Wat ym klet ba u Myntri Rangbah ka Jylla u ladep pynpaw ba ka jingpynbna (notification) ladep ban pynmih ha kaba iadei bad ka rta kaba u kren ha ka 26 tarik, Rymphang, 2024. Haba nga iakren bad u Secretary jong ka tnat Kam Pohing ba ka Office Memorandum kaba thymmai dang don hapdeng ka jingpynkhreh haba kumta kumno phi lah ban iaid shakhmat ban khot aplikeshon ia ki khun samla,” la kynthoh u Bah Nongrum bad bynrap ba kane ka la pynkulmar jingmut shuh shuh ia ki khun samla kiba thep kam.
“Haoid, u Symbud Myntri Rangbah u la pule ia ka 2nd para jong ka Office Memorandum 3.02.202 hynrei phi khlem kdew ia ka kyntiew kaba ong, kumba la pynbna da ka Personel Department. Dei na kata ka daw kane ka Advertisement ka long kaba be-ain,” u la ong.
U la ong shuh shuh katba ka Office Memorandum kaba thymmai kam pat mih, ka Office Memorandum kaba la pynmih ha ka 3.02.2022 ka dang ieng kaba kdew ia ka rta thungkam haduh 32 snem ka rta bad pynjlan sa 5 snem kaba long 37 snem.
“Ka tnat Pulit ka dei ban leh ia la ka jong ka kamram bad lada phim shimkhia ka dang don sa kawei pat ka lynti kaba nga dang pynkhreh ban iaid shakhmat,” u la ong.
