Shillong, Nohprah, 09: Ka Aiom Christmas ka la wan bad bun ki long iing ki la bun kam ban thied leit pet ia ki riam ki beit na ka bynta ki khun ki kti, hynrei ki mad pat ia ka jingeh ba khraw hadien ba ki Pulit kim shym la shah ia ki kali Private ban pynieng kali ha ka Parking Lot jong ka Shillong Municipal Board (SMB) kaba don pyrshah ia ka State Bank of India (SBI) hajan ka Shillong Club Ltd.
Katkum ka hukum ba la pynmih da ka District Magistrate jong ka East Khasi Hills ha ka 28 tarik Naiwieng 2023, la bthah ba baroh ki kali Shillong Tourist Taxi kiba kamai sha Guwahati naduh ka 1 tarik mynta u bnai ki dei ban pynieng ia ki kali kamai ha kane ka jaka bad ym shym la kdew ha ka hukum ban ym shah shuh ia ki kali Private ban pynieng ha kane Parking Lot.
Ha ka jingleit jurip ia kane ka Parking Lot, la sakhi ba ka la thylli bad bun ki kali kamai Tourist kim shym la rung satia ban pynieng ia ki bad kiba wan ki don kai kumba san ne hynriew tylli ki kali.
Ki nongwai jong kane ka Parking Lot ki la iathuh ba bun sien ki shah tim da ka sih ka sang ha ki paidbah namar ka jingbym shah rung ia ki kali Private, hynrei la phah ia ki ban ieng shapoh khrum kaba dei ka jaka kaba ktieh bad bym don wat tang ka bording bad tang shu poi 4:00 baje lah dum hi tliw bad ki bun ki bym sngew shngaiñ ban pynieng ia ki kali.
Ki nongpeit bad nongpyniaid ia kane ka Parking Lot, ki la iathuh ba ha kawei ka step la don ki Pulit kiba la bthah ba kim dei ban shah rung ia ki kali Private bad lada lap ba ki don yn pyndait da ki khnap bad yn kem ruh wat ia ki nongap ka Parking Lot.
