Shillong, Jylliew, 08: Ka Harijan Panchayat Committee (HPC) ha ka sngi Balang ka la pyntip ha Ïingbishar Meghalaya High Court ba ka la pdiang ïa ka Blue Print ba la tyrwa da ka Sorkar Jylla ban pynkynriah ïa ki 342 tylli ki longïing jong ki Harijan kiba buhai shnong ha Them Ïew Mawlong sha ka jaka ba ju don ka ophis jong ka Shillong Municipal Board (SMB), Bivar Road.
Ha ka hukum ba la pynmih ki arngut ki nongbishar, kata, u Chief Justice ka Meghalaya High Court u Justice Sanjib Banerjee bad u Justice W. Diengdoh ka la ong, “na ka liang u Learned Advocate-General u la pyntip ba u la ïoh ïa ka kaiphot na u Nongïasaid aiñ jong ka Harijan Panchayat Committee ba ka la mynjur halor ki nongrim ïa ka Blue Print ba ka Sorkar Jylla ka ladep pynkhreh bad la pyntip ruh ba ki don katto katne ki jingpynkylla thymmai katkum ka jingai jingmut ha ki katto katne ki bynta.”
“Namarba ka Sorkar Jylla ka dang peit sani ïa ki jingai jingmut ban pynkylla, kane ka jingshim bishar kan bteng biang hadien lai taïew bad kyrmen ba kane ka mat kaba la sahteng la slem bha yn sa lah ban pynkut noh,” ong ka hukum.
Ka Ingbishar Meghalaya High Court ka la pyntip ba kan sa shong bishar biang ia kane ka mukotduma ha ka 3 tarik, Naitung 2023.
U Secretary jong ka Harijan Panchayat Committee u Gurjeet Singh ha ka jingiakren bad ka Batesi Tv u la pynpaw ba um pat lah ban iathuh kiei ki jingpynkylla ha ka Blue Print hynrei u la pyntip ba un sa ai jingtip tad ynda u Muktiar jong u, u la wan phai na Delhi.
Kum ban shu pyntip hangne, ka Harijan Panchayat Committee ka la kyntait ïa ka Blue Print ba la wanrah da ka Sorkar Jylla hynrei ka la pan pynban da ka jaka kaba mar 200 square meter sha kawei pa kawei ka longïing jong ki 342 tylli ki rympei Ïing hapoh ka European Ward nalor kaba pynlut ruh ia ka bai shna ïing.
Ha ka 31 tarik Nailar, 2022, ka Sorkar ka la pyntip ïa ka rai ban shna ïa ki ïing bun mala ha ka jaka kaba 2.5 acre, kaba dei jong ka Shillong Municipal Board (SMB) na ka bynta ban pynkynriah ïa kine ki 342 tylli ki longïing na Them Iew Mawlong.
Ha ka jubab ba hynriew sla ba la phah sha u Deputy Secretary jong ka Sorkar Jylla bad sha kiwei kiwei ki Tnad Sorkar, ka HPC ka la kynnoh ba ka jingtyrwa jong ka Sorkar ka dei ka bym pat biang pura bad ka bym ïahap satia.
