Shillong, Jylliew, 08: Ka High Powered Committee jong ka Assembly Secretariat ha ka sngi Palei ka la shong ia ka jingialang ban iathir bad ban iatai sani ha kaba iadei bad ka jingbteng ban shna ia ka building jong ka Assembly bathymmai ha Mawdiangdiang.
Ha kane ka jingialang kaba la long ha Taj Vivanta, Shillong, la iashim bynta lang da u Lamphang jong ka ling dorbar Thawain u Thomas A. Sangma, u Myntri Rangbah ka Jylla u Conrad Kongkal Sangma, ki Symbud Myntri Rangbah kiba kynthup ia u Bah Prestone Tynsong bad ia u Bah Sniawbhalang Dhar, ki MLA bad ki Ophisar na ki tnat treikam bapher bapher.
U Thomas A Sangma ula pyntip ba ka High Powerd Committee jong ka Assembly Secretariat bad ki tnat treikam bapher bapher ki la mynjur ia ka jingtyrwa na ka bynta ban bteng biang ia ka jingshna ia ka Assembly ba thymmai ha ka wat kaba ar bad ia kane ka jingtyrwa yn sa phah sha ka Ministry of Development of North East Region (DoNER).
