Shillong, Nailar, 30: Ka Sokar Jylla ka dang ap ïa ai ka jingbthah jong ka Ministry of Home Affair ka Sorkar Pdeng shwa ban shim ïa ka rai ha kaba ïadei bad ka jinglap ïa ka met jong uwei u politishian na ka ri Bangladesh ha ka shnong Dona Bhoi, East Jaiñtia Hills District, kaba jngai kumba 1.5 kilomitar na khappud Indo-Bangladesh.
Ïa ka met, ba la lap ha ka janmiet 26 tarik Nailar, 2024, la ithuh na ka passport jong ka ri Bangladesh kum u Ishaque Ali Khan Panna, u General Secretary barim jong ka Bangladesh Chhatra League (BCL) bad u dkhot ba hakhmat eh jong ka Awami League na Pirojpur District. Ïa ka met jong u, la buh ha ka jaka buh metïap ha Khliehriat Civil Hospital na ka bynta ka jingpynithuh bad ban pyndep shuh shuh ïa ki kyndon jong ka aiñ.
Haba pyntip ïa kane ha ka sngi Thohdieng, u Symbud Myntri Rangbah uba khmih ïa ka tnat Kam Pohing ka Jylla u Bah Prestone Tynsong u la ong, “ngi la pyntip sha ki bor ba halor bad sha ka High Commission jong ka ri Bangladesh bad India (halor ka jinglap ïa ka met) bad mynta ngi dang ap ïa ka jingbthah na ka tnat Kam Pohing ka ri sa kaei pat ka bynta ba dang dei ban leh leh.”
U la pyntip ruh ba ka sorkar ka la bthah ban leh ïa ka Forensic Test ban dup tip ïa ka daw tynrai kaei kaba la jia.
U Bah Tynsong u la ïathuh ba ki bahaing hasem jong u Panna ki ladep ithuh ïa ka met bad mynta ki dang don ha lynti ban wan shimti ïa ka met.
“Ka Ministry of External Affairs bad ka Ministry of Home Affairs ki la shimkhia lut nadong shadong bad ka kamram jong ngi kum ka Sorkar Jylla ka long ban shu aiti noh ïa ka met sha ki bahaing hasem tang shu wan poi ha Meghalaya (India),” u la ong.
U Symbud Myntri Rangbah u la ong ba katkum ka jingtip ba la ïoh pdiang na ka tnat shipai BSF, kam don kano kano ka jingpyrshang jong u Panna ban jam shapoh u pud u sam ka ri India.
“Namarba na ka liang jong ka ri Bangladesh ki la kam ba u nongïalam ka Awami League u la pyrshang ban phet sha India bad katba u dang don ha lynti hynrei ki shipai BSF ki la pynshisha bad ong ba kam long kumta bynrei tang hadien 2-3 sngi ïa ka met jong u la lap ha hapoh kumba 1.2 ne 1.3 kilomitar shapoh u pud u sam jong ka ri India,” u la ong bad ïathuh ba kaiphod post mortem ka pynpaw ba u Panna u la shah pynïap.
“Dei namar kane ka daw, ka kamram jong ka Sorkar jylla ka long ba ngin hap ban pynlong shuh shuh ka jingtohkit bad kata ka dei ka jingleh ïa ka forensic test,” u la bynrap.
Shuh shuh u Bah Tynsong u la ong, watla ka kaiphod ka kam ba Panna ula rah ruh shibun ka pisa ha ka met hynrei katkum ka jinglap jong ki pulit bad ki BSF, kim shym la lap eiei satia ïa kaba kum kata.
Haba kylli, u Symbud Myntri Rangbah u la kubur ba kane ka la jia ha ka por ba ka Sorkar Jylla ka la pynjari ïa ka korphiw miet ha shilynter ka khappud Indo-Bangla ban khanglad ïa ka jingrung tuh jong ki mynder na ka ri Bangladesh sha India.
Shuh shuh u Bah Tynsong u la ong, “namarba ïa ka metïap la lap hapoh ka 1.2 ne 1.3 kilomitar jong u pud u sam ka ri India ka pynpaw ba u Panna lada um shym la wan rung beaiñ sha India kumno ïa ka metïap jong u yn lap hapoh u pud u sam ka ri India bad kaba ar pat ka lah ban long ba lehse don mano mano ba pynïap ïa u bad bret ïa ka met ïap sha u pud u sam jong ka ri India. Kine ki dei ki jingtohkit kiba hap ban tih bniah bha ban ïoh jingshai.”
U Bah Tynsong u ong, halor kane ka jingjia kam da donkam than ban phah tohkit ha ka CBI ne ha kino kino ki kynhun tohkit ka Sorkar Pdeng
