Shillong, Naitung 3 : Ki dkhot ka KSU Shillong Mihngi Circle ha ka lah sngi U Blei ka 3 tarik ki la leit ban ia kynduh ia ki bor pyniaid ka North East Institute of Ayurveda & Homeopathy (NEIAH) hadien ba ki la ioh jingtip ba ka director jong kane ka skulbah ka la thep kam jubor ia kawei ka briew na Uttar Pradesh kum ka Contractual Attendant.
Ki dkhot ka seng hapoh ka jingialam u President u Bah Sonstar Nongkhlaw ki mana ia kane ka skulbah ba ka dei ban weng noh mardor ia katei ka briew kaba nabar bad dei ban thep beit da ki Khasi ha ki kam contractual baroh.
Ki dkhot ka seng ki la mana ruh ba ym dei ban pynskhem (regularise) jubor ia kino kino ki bar jylla ba trei contractual ha NEIAH.
Ka seng ka la maham lada ki bor pyniaid jong ka NEIAH khamtam ka Director kim weng kam ia ka bar jylla, ka seng kan sa shim da ki sienjam kiba tyngeh.
