Nongpoh, Naitung, 03: Da kaba buh hakhmat ia ka thong ban pynneh ia ka shongsuk shongsaiñ ha ka thain Block-II, u Chief Executive Member (CEM) jong ka Khasi Hills Autonomous District Council (KHADC), u Bah Pynïaid Sing Syiem bad ki Executive Member ha ka lah sngi U Blei ki la leit jngoh ia ka Raid Nongtung kaba hap hapoh ka Block II. Ka jingleit jngoh ia kane ka Raid, ka long ban pynthikna ba ki paidbah nongshong shnong kin im hapdeng ka shongsuk shongsaiñ.
Ia u Bah Pynïaid bad ia ki Executive Member la pdiang sngewbha da u Avijit Kro, uba long u dkhot jong ka Karbi Anglong Autonomous Council (KAAC), ryngkat bad ki ophisar jong ka Council. Kane ka kynhun ka la hiar sha ka shnong Ummat shwa ban leit jngoh ia ki Mawbah ki 12 Kur jong ka Raid Nongtung, kaba long ka jaka ba kyntang ba ju pynlong ia ki jinglehniam na ka bynta kiba la iap.
Ki Executive Member jong ka KHADC kiba la synran lang ha kane ka jinghiar jurip ki kynthup ia u Deputy CEM u Bah Pynshngaiñ N Syiem, u Chairman jong ka Council u Bah Lamphrang Blah, u Deputy Chairman u Bah Charles Marngar, ki Executive Member ba kynthup ia u Bah Rangkynsai Kharbuki bad u Bah Teibor Pathaw. Ki nongialam shnong na ki shnong bapher bapher ruh ki la wan synran lang ha kane ka sngi.
Haba pynpaw ia ka jingthmu jong ka Council, u Bah Pynïaid Sing Syiem u la iathuh ba ka Council ka angnud ba ki paidbah kiba sah ha ka Raid Nongtung kin pynneh ia ka shongsuk shongsain bad ia ki jingtei u mynbarim kiba don ha kane ka thaiñ. U la ong ruh ba ka District Council ka dei ka nongri nongsumar ia ka khyndew ka shyiap, ia ka riti kaba la hiar pateng na ki longshwa. Ha kaba iadei bad kane, ka Council ka la thmu ruh ban pynneh pynsah ia ki Mawbah ki 12 Kur ha Raid Nongtung, kiba don hapoh ka shnong Ummat. U Bah Pyniaid u la kyntu ruh ia ki nongialam shnong, khamtam ia ki Khasi bad ki Karbi kiba sah ha kane ka thaiñ ba kin iatreilang ban pynneh ia ka shongsuk shongsain
Shuh shuh u Bah Pynïaid u la pyntip ba ka KHADC bad ka KAAC ki la iatreilang ban wanrah ia ka shongsuk shongsain ha kane ka thaiñ.
Da ka jingpynsdang ia ka jingiakren pynbeit pud ha ka wat kaba ar hapdeng ka sorkar Assam bad ka Sorkar Meghalaya ka ban sa long shen ha Block II, ka Council ka khmihlynti ba kane ka jingiakren kan long kaba seisoh. Ka Council ka la ioh pdiang ruh ia ki jingai jingmut na ki nongialam shnong bad na ki dkhot kiba don hapoh ka Regional Committee. U Bah Pyniaid u la kular ba ia baroh ki jingai jingmut na ki paidbah yn sa shimkhia naba ma u, kum u CEM bad u Dy. CEM ki dei ki dkhot jong ka komiti iapynbeit pud ba la thung da ka Sorkar ia kaba la khlieh da u Symbud Myntri Rangbah ka Jylla u Bah Prestone Tynsong kum u Chairman.
