Shillong, Rymphang, 15: Ka Myntri Khynnah jong ka Sorkar Pdeng ba dei khmih ia ka Tnat Social Justice and Empowerment, ka Pratima Bhoumik ha ka sngi Palei ka la plie paidbah ia ka prokram ai jinghikai pyntbit ha ka sap treikam hapoh ka PM-DAKSH (Pradhan Mantri Dakshta Aur Kushalta Sampann Hitgrahi) Yojana, na ka bynta ki briew kiba don jingduna ha ki dkhot met ha nongbah Shillong mynta ka sngi. Ia kane ka prokram la pynlong ha Composite Regional Centre for Skill Development, Rehabilitation and Empowerment of Persons with Disabilities, Shillong.
Ka Myntri ka la sam ruh ia ki NIRAMAYA Health Card sha ki nongioh jingmyntoi. Ki la don 10 ngut ki briew na nongbah Shillong kiba la pynrung kyrteng na ka bynta ka prokram ai jinghikai ha kane ka jingialang mynta ka sngi.
Ha ka jingai jingkren ha ka jingialang ka Bhoumik ka la ong ba ka sorkar pdeng ka kut jingmut ban pynkup bor ia ki briew kiba don jing duna ha ki dkhot met bad ka trei borbah ban pynurlong ia ka thong jong u Myntri Rangbah duh ban ai jingshakri ia baroh ki briew. Ka Myntri ka la ong ba kane ka jingkut jingmut ka paw shai na ka jingwan jngoh u Myntri Rangbah duh Narendra Modi ia ka thain shatei lammihngi kumba 60 sien naduh u snem 2014, katba ka kynhun Myntri jong u ka la wan jngoh ia ka thain shatei lammihngi palat 450 sien. Ka jingjop kalong ka jingwan ka jingkylla ha ka thain bad ka Tnat jong ka ruh ka la trei borbah ban plie lad ia ki briew kiba don jingduna ha ki dkhot met na ka bynta ka roi ka par kaba kynthup lang ia baroh.
Ka la ban jur ia ka jingdonkam ka prokram ai jinghikai pyntbit ha ki sap treikam ban pynkup bor ia ki briew kiba don jing duna ha ki dkhot met bad ka tnat jong ka, kalong kaba kloi ban ai kino kino ki jingiarap ba donkam na ka bynta ka bha ka miat jong ki. Ki sienjam ba la plie da ka tnat ki kynthup ia ki kam wanrah jingkylla kiba pyni ia ka jingpeit bniah ka Sorkar ban don ka imlang sahlang kaba pdiang lang ia baroh, ka la bynrap. Ka sienjam ka pyni ia ka jingieng skhem ka DEPwD ban kyntiew ia ka hok bad pyndonkam ia ka teknoloji ban kyntiew ia ka jingim jong ki briew kiba don jingduna ha ki dkhot met ha kylleng ka ri, ka la bynrap.
Ka la ai jingtip ha ka jingialang shaphang ki bynta jong ki skhim ba la pyntreikam da ka Tnat na ka bynta ki briew kiba don jing duna ha ki dkhot met. Ka la ong ba ki briew kiba don jing duna ha ki dkhot met kilong ka bynta ba kongsan jong ka jingdon ki briew kiba la tbit ha ki kam bad ka sorkar pdeng ka kut jingmut ban tei ia ka jinglong jingman kaba plié lad ia ki briew kiba don jing duna ha ki dkhot met.
Ka la iaroh ia ki sienjam jong ka Composite Regional Centre for Skill Development, Rehabilitation and Empowerment of Persons with Disabilities (CRC- Shillong) ha ka jingai ki jingshakri ba bha sha ki briew kiba don jingduna ha ki dkhot met. Ka Myntri ka la ai jingiaroh kyrpang ia ki jingai jingshakri jong ka centre sha ki briew kiba don jingduna ha ki dkhot met da kaba pynlong ia ki jingai jingsumar bad ki jinghikai pyntbit na ka bynta ka jingioh ia ka jingkoit jingkhiah. Ka la iakren bad ki briew kiba don jing duna ha ki dkhot met bad sngap ruh ia ki khana jingjop ba ki la iathuh. Ka Myntri ka la iaroh ruh ia ki sienjam jong ka sorkar jylla ban rah shakhmat ia ki sienjam jong ka Tnat Social Justice and Empowerment jong ka sorkar pdeng na ka bynta ka jingmyntoi jong ki briew kiba don jing duna ha ki dkhot met ha ka jylla.
Ha kane ka jingialang la iadonlang ruh u Commissioner & Secretary sha ka sorkar Meghalaya, Tnat Social Welfare, Pravin Baksi, ka Commissioner for Persons with Disabilities Sabrella B Marak bad ki heh ophisar jong ka sorkar jylla.
