Shillong, Naitung, 08: U Myntri Rangbah ka Jylla Meghalaya u Conrad K. Sangma ryngkat ka jingsakhi lang jong u Chief Justice jong ka Ingbishar Meghalaya High Court u Sanjib Banerjee ki la plie paidbah ia ka shlem treikam ba thymmai jong ka Iingbishar Meghalaya High Court ha ka sngi Saitjaiñ.
Ha kane ka sngi, la sakhi lang da ka Myntri kaba peit ia ka tnat Ain jong ka Sorkar Jylla ka Dr. Mazel Ampareen Lyngdoh, u Myntri ka tnat Pule Puthi u Rakkam Sangma, ki nongbishar jong ka High Court bad kiwei kiwei.
Ha kane ka shlem treikam ba thymmai ba la tei ha ka jinglut kaba kot 45 klur tyngka ka don ia ka Auditorium, ka jaka shong jong ki nongsaid ain bad kiwei kiwei de ki kamra na ka bynta ka treikam ka treijam.
Haba kren ha jingialang, u Conrad K. Sangma u la ai khublei ia ki jingtrei shitom kaba la lah ban tei ia kane ka building kaba thymmai. U la ong ba kane ka shlem treikam ka dei kaba la shna kyrpang ban buh ia ki kot kiba ai jingtip shaphang ka aiñ kiba iadei bad ka jingai ia ka hok sha ki paidbah.
U la iaroh ruh ia ka Meghalaya High Court kaba la long ka nongiada ia ki nongrim jong ka hok, ka jingtreikam kaba shai bad ka jingpynioh ia ka hok sha baroh.
U la iathuh ba ka Sorkar ka la buh hakhmat ia ka thong ban pyndep lut ia baroh ki jingshna hapoh ka jylla. U la iathuh ba ka jingmang pisa ha ki snem baladep ka long ban pynjanai bad ban kyntiew kyrdan ia ki government LP bad UP schools, bad ia ki Higher Education.
Haba iathuh ia ka thong jong ka Sorkar halor ka pule ka puthi, u Myntri Rangbah u la ong, ba ka jingmaramot, ka jingshna pynbna bad ka jingtei thymmai palat 2500 tylli ki LP & UP School kin sa nang wan ha kine ki sngi bad ki snem.
Kane ka jingshimkhia ka long ban pynjanai ia ka pule ka puthi bad ban ai sha ki khynnah skul ia ki lad jingpule kiba bha ha baroh kawei ka jylla.
Ka jingtheh pisa jong ka Sorkar ban shna ia ki skul ka long ban pynkhlaiñ ia ka thymmei jong ka pule ka puthi ha ka jylla. Da kaba shna ia ki shlem pule kiba bha bad ka jingdon jong ki tiar pule, ka sorkar ka la angnud ban ailad ia ki khynnah skul ba kin dup kynjoh sha ka thong kaba ki la pynlut ia ka jingim jong ki ha ka pule puthi.
U Chief Justice jong ka Ingbishar Meghalaya High Court u Sanjib Banerjee, u la pynkynmaw ba ka shlem treikam kaba thymmai kan pynjanai ia ki jingtreikam jong ka bishar ka khadar.
