Shillong, Naitung, 08: U Myntri Rangbah ka Jylla u Conrad K. Sangma, ha ka sngi Saitjaiñ u la plie paidbah ia ka National Law University (NLU) ha Temporary Campus kaba don ha Mayurbhanj Complex, Shillong.
Ha ka jingplie ia kane ka skul pule aiñ la sakhi lang da u Chief Justice jong ka Ingbishar Meghalaya High Court u Sanjib Banerjee, u Myntri ka tnat Pule Puthi u Rakkam A. Sangma, u Vice Chancellor jong ka University, u Prof Indrajit Dube bad kiwei kiwei.
U Myntri Rangbah haba kren ha kane ka sngi, u la ong ba ka long kaba donkam ban buh jingthoh bad ban pynlong aiñ ia ki riti ki dustur jong ki riewlum. U la pynpaw ruh ia ka jingangnud jong u ba ka NLU kan long ka Center of Excellence na ka bynta ban wad bniah halor shaphang ki jingpynlong aiñ ia ki riti ki dustur jong kane ka thaiñ Shatei Lammihngi ka ri India.
U Sangma u la pynkynmaw ba ka jingdon jong ka NLU kan wanrah ia ka jingkylla ha ka jingpule ia ka aiñ bad ka jingwad bniah ha Meghalaya. U la iathuh ruh ba ki jingeh kiba iadei bad ka rukom pyntreikam ia ka aiñ hapoh ka jylla ba la palat san phew snem na ka daw ka jingbym don ki shlem pule kiba paka ban ai jinghikai, bad ban tip shaphang ka aiñ. U la ong ba ka jingdon jong ka NLU kan pynthikna ba kane ka shlem pule kan ai jingmyntoi shikatdei eh ia ki samla pule aiñ bad kiwei kiwei de ki lad jingshakri.
U la pynpaw ka jingkyrmen ba ka NLU kan long ka shlem pule kaba wanrah ia ki lad jingtip kiba thymmai, bad ban wad bniah. U la iathuh ba ki jingpule ha kane ka skulbah ki long halor ka Business Administration, ka Policy Research, bad ka Data Sciences kiba la kynthup lang bad ka Aiñ, ka ban iarap ia ki samla pule ban dup lah ban iakhun pyrshah ia ki jingeh ki ban sa wan.
Ha kajuh ka por, u Myntri Rangbah u la ong ba ka por ka ladei ban pynrung ia ka Smart Technology ha ka pule puthi namarba kane kan pyniasoh bad ka saiñ jingtip shabar ka pyrthei ka ban iarap ia ki samla pule ba kin ioh jingtip shuh shuh halor ka phang pule ka jong ki.
Ka Sorkar ka la bei pisa T. 25 crore ban shna ia ki jingdonkam jong kane skulbah ha ka Temporary Campus, ha kaba T. 19 klur ladep ban pyndonkam.
U Chief Justice jong ka Ingbishar Meghalaya High Court u Sanjib Bannerjee haba kren ha kane ka sngi u la ong, ba ka jingplie ia ka National Law University (NLU), kan pynmyntoi ia ki samla pule ban tip shaphang ki aiñ bad ki riti ki dustur jong ki riewlum ha kane ka thaiñ.
U la ong ruh ka NLU ka la buh hakhmat ia ka thong ban ka jingpule shaphang ka aiñ da kaba pynrung ia ki lain pule kum ka Data Science bad ka Artificial Intelligence ha ki lynnong pule.
U Myntri ka tnat Pule Puthi, u Rakkam A. Sangma u la ong ba ka jingdon National Law University (NLU) kan pynkylla dur ia ka lawei pule jong ka jylla. U la ong ruh ki samla pule kin ioh ia ki tiar jinghikai bad ki saiñ jingtip ki ban pynproh ia ki jabieng khnang ba kin dup lah ba noh synñiang sha u sup u thiar jong ka ka pule ka puthi shaphang ka aiñ ha ka Jylla.
Haba pynpaw ba ka bynta kaba kongsan jong ka Kashari ka long ban pynioh ia ka hok sha ki paidbah, u Rakkam, u la ong, “ka NLU kan sa pynkhreh ban pynmih ia ki Muktiar kiba tbit ki ban long ki nongiasaid na ka bynta ki paidbah, ki ban pynioh ia ka hok bad ban iada ruh ia ka hok jong ki paidbah.”
“Da kaba ai jinghikai shaphang ka aiñ bad ka jingngam jylliew ban sngewthuh ia ka aiñ, ka NLU kan sa pynkup bor ia ki samla pule ban long ki nongpynkylla dur ia ka imlang ka sahlang,” u la ong.
