Agartala, Naitung, 13: Ka jingïakynad ka la khie kynsan ha Ganda Twisa Sub-division kaba hap hapoh ka Dhalai District, Tripura hadien ba uwei u samla riewlum u la khladnoh ha ka sngi Thohdieng.
Katto katne tylli ki dukan bad ki iing ki la shah wiang ding bad shah pynjulor.
Tang hadien katto katne kynta hadien kane ka jingjia, ki bor synshar district ki la pynjari da ka Section 163 jong ka Bharatiya Nagarik Suraksha Sanhita (BNSS) (ba la tip mynshwa kum ka Section 144 CrPC). Nalor kata, ka Sorkar ka la khang ruh 24 kynta ïa ka Internet. Ki bor Sorkar ki la pynkhlaiñ ïa ka jingpahara ban pynthikna ba ka jingïakynad kan ym pur.
U District Magistrate jong ka Dhalai u Saju Waheed ula ïathuh ba kane ka jingïakynad ka la jia hadien ba arngut ki khynnah na ka jaidbynriew riewlum san sngi mynshwa ha kaba uwei na ki u la mynsaw. Une u khynnah u la khladnoh ha Hospital ha Agartala ha ka sngi Thohdieng bad tang hadien kata, ka la mih ka jingïakynad ha kane ka shnong.
“Ïa mynta kam don shuh kano kano ka jingïakynad. Ngi la plie ruh ïa ka shelter house na ka bynta kito ki longiing kiba la duh noh ïa ki dukan bad ki iing. Ïa ka jingïalang pynïasuk ngi la pynlong mynta ka sngi,” u la ong.
U khynnah uba la ïap u dei uba la tip kyrteng kum u Parameshwar Reang na ka jaidbynriew Reang hadien ka jingïakynad ha kawei ka tamasa kaba la tip kum ka ‘Anondo Mela’ kaba la long ha Ganda Twisa san sngi mynshwa.
U Pradyot Kishore Manikya Debbarma uba long u nongïalam jong ka TIPRA Motha kaba ïatreilang bad ka BJP kaba bat ïa u lakam synshar ha ka jylla Tripura, u la ong, ba ka Sorkar ka dei ban shimkhia halor ka jingïap jong u Reang.
“Nga pynrem jur ïa ka jingshah pynïap jong u Parmeshwar Reang ha Gandatwisa. Da lade hi nga la ïakren bad ki heh Pulit bad nga la dawa ba dei ban kem ïa ki nongkam bymman hapoh ki kyndon jong ka IPC. Ha kajuh ka por nga kyrpad ïa ki paidbah ban pynneh pynsah ïa ka shongsuk shongsaiñ, bad dalade hi ngan sa leit ban ïakynduh ïa ki bahaing hasem. Ngi dawa ïa ka hok!” la thoh u Pradyot ha ka Facebook Account.
