Shillong, Naitung 04: Ka seng sainpyrthei Hill State People’s Democratic Party (HSPDP) ka la rai ban pynkut noh ïa ka jingïatreilang bad ka seng sainpyrthei United Democratic Party (UDP) hapoh ka lama jong ka Regional Democratic Alliance hadien ka jingshah rem noh ha ka elekshon Lok Sabha ba dang shu dep long shen.
Ka HSPDP bad ka UDP ki la pynieng ïa u President barim jong ka HYC u Bah Robertjune Kharjahrin kum u kyrtong ha ka elekshon Lok Sabha.
Ïa kane ka pyntip da u Working President ka UDP u Bah Paul Lyngdoh uba long ruh u Myntri ka Sorkar Jylla ha ka jingïakren bad ki lad pathai khubor ha ka sngi Palei.
“Ki don bun ki daw halor ka jingbym poi jong u kyrtong ka RDA sha ka thong, bad kata ka daw kumba phi ïohi wat ka HSPDP ruh ka la rai ban weng noh na ka RDA,” ong u Bah Paul.
“Namarta kine ki dei ki daw kiba kongsan ba hap ban pdiang. Mynta ki don bun ki daw bad kawei na kita ki daw ka long ba ngim lah ban trei bha ha ka rukom kaba ngi la leh bad kaba ngi la rai ha ka RDA, ïa ka kyrteng jong u kyrtong la pynbna ha ka khyllipmat ba khatduh, shi snem hadien ba u kyrtong jong ka VPP u la leit rung kylleng ki shnong,” u la ong.
Haba kylli, u Bah Paul u la ong, “haoid, ki (HSPDP) la pynpaw ïa ka jingbymmon shuh ban dang ïatreilang hapoh ka RDA. Phi lah ban ong ba ngi pyrkhat ba kata ka dei kaba bha tam da kaba ïaid noh la ka jong ka lynti ba ngim lah ban kynjoh wat tang 5 percent na ka jingïoh vote ha kane ka kynti khamtam jin da lada ïakhun beit tang ka UDP mrawei, lehse ngi lah ban tam ïa kata. Kine ki dei ki daw.”
“Kata ka dei ka jingpynpaw da ka HSPDP bad ngi donkam ban ïakynduh biang ban ïapynbeit ïa kine ki mat,” u la bynrap.
