Shillong, Jymmang, 18: Ka kynroh jong ka Iingdorbar Thawaiñ ba thymmai ka Jylla ha ka shnong Mawdiangdiang, New Shillong Township ka la twa ha ka sngi Thohdieng.
Kane ka la jia tang hadien ar snem ba u tnum pyllun (Dome) jong kane ka Iingdorbar Thawaiñ bathymmai u la khyllem ha ka 22 tarik, Jymmang, 2022.
U nonglum khubor uba la leit jurip u la lap ba kane ka kynroh ba la twa ka la hap sha ka surok jong ka jaka ki riewshimet.
La lap ruh ba ki nongtrei ki la kyndang da ka puhshilum ia ki jingker bad ki paia jong ka kynroh ba la twa kumba shiphew phut tam ne duna eiei shwa ban tei noh da ka kynroh kaba thymmai.
U Myntri Rangbah ka Jylla u Conrad Kongkal Sangma uba la ioh jingtip ha ka sngi Thohdieng halor kane ka jingjia na u Lamphang jong ka Ingdorbar Thawaiñ ka Jylla u Thomas Sangma marmar ha ka sngi Saitjaiñ u la leit jurip ia ka kynroh ba la twa ryngkat ka jingsynran lang jong ki ophisar ka tnat PWD.
U Conrad u la iathuh ba ka jingtwa jong ka kynroh ba la shna da ka Assembly Secretariat kam don jingiadei eiei bad ka jingshna ia ka Building jong ka Ingdorbar Thawain da ka tnat PWD.
Katkum ka jingiathuh jong u Myntri Rangbah ba ki Ophisar ka tnat PWD ki dang pynlong ia ka jingtohkit kaba bniah ban lap ia ka daw tynrai halor ka jingtwa jong kane ka kynroh.
U la pyntip ruh ba ka kynroh ba la ker ia u pud u sam jong ka Ingdorbar Thawaiñ ka dei kaba ladep shna naduh ar snem mynshwa bad bynrap shuh shuh ba ka jingtwa ka kynroh ka dei na ka daw ka jingtwa ka khyndew bad pynshai ruh ba ka jingtwa jong ka kynroh kam don jingktah eiei ruh em ia ka jingshna ba dang iaid shakhmat ia ka Iingdorbar Thawaiñ ka Jylla.
