Shillong, Jymmang, 28: Ka kynhun State Disaster Response Team ba la lamkhmat da u Sub Inspector M.A Thubru ha ka 27 tarik u Jymmang, 2024 ki la leit ban pyllait im ia ki phra ngut ki briew na kawei ka iing mala kaba don ha ka shnong Lumparing, Shillong na ka daw ka jingtwa jong ka khyndew hajan kane ka iing.
Katkum u kyrwoh bad ki dur ba la phah da ka tnat Civil Defence and Home Guard lyngba u Divisional Commandant of Home Guards, Shillong bad Public Relations Officer jong ka Directorate of Civil Defence & Home Guards u Bah PH. Shylla, la iathuh ba kane kajuh ka kynhun ka la hiar sa sha Bivar Road ryngkat bad ki Pulit ka tnat Fire & Emergency Services bad ki nongtrei jong ka Shillong Municipal Board ban pyllait im ia ki briew kiba sah ha Bivar Road, Shillong hadien ka jingtwa jong ka kynroh. Ha kane ka jingjia, ia uwei u briew uba la mynsaw la pynkit noh sha Hopsital da ki paidbah nongshong shnong.
Ha kawei pat ka jingjia, ha Rilbong ka kynhun State Disaster Response Team ba la lamkhmat da u Sub Inspector S. Dkhar, ryngkat ka jingsynran lang jong ki nongtrei ka tnat Forest ki la ot noh ia ki dieng ba la buh jingma ia ki jingim jong ki briew. Ka kynhun State Disaster Response Team ka la pyllait im ruh sa 14 ngut ki briew kiba sah ha ki jaka kiba ju jia khah khah ki jingtwa khyndew.
Ha ka 27 tarik u Jymmang, 2024 ka kynhun State Disaster Response Force ka la pynkhuid ia ki dieng ba la khyllem ha Springside School ha ka shnong Malki, Shillong.
Shuh shuh, namar ka jingwan lynshop jong ka eriong Remal ha West Jaintia Hills, ka Quick Reaction Team jong ka tnat Civil Defence and Home Guards District ba la lamkhmat da u Sub Inspector Y. Challam ha ka step 28 tarik u Jymmang, 2024 ki la pynkhuid noh ia ki synrum jong ki ding kiuba khyllem ha ka shnong Dulong kaba la pynwit ia ka leit ka wan jong ki kali bad kiba la buh jingma ia ka jingim jong ki paidbah bad ki nongiaid nongieng.
Ka Quick Reaction Team jong ka tnat Civil Defence and Home Guards, West Jaintia Hills ki la pynkynriah ia ki dieng ba la khyllem ka shnong Khimusiang, Jowai.
Ha Tura, ka kynhun State Disaster Response Team ka la iarap ia ki bor synshar district ban pynkhuid ia ki synrum jong ki ding kiba la shah pynkhyllem ha ka eriong ha Members’ Hostel Junction, Tura ha ka step 28 tarik u jymmang, 2024 bad kumjuh ruh kane ka kynhun ka la pynkhuid ruh ia ki dieng kiba la ngat ha ki sainar elektrik hajan Gandrak Dare ,Upper Chandmary ,Tura.
Ha kawei pat ka jingjia, ka kynhun State Disaster Response Team ba la lamkhmat da u Inspector S.A Marak ryngkat bad ki nongtrei jong ka tnat Forest ki la lah ban weng ia u dieng uba la khyllem hajrong ka iing ha Lower Balsanang,Tura bad ha kane ka jingjia ym shym la don satia kano kano ka jingjia ba sngewsih.
