Shillong, Jymmang, 27: U Bah Phurly Suting uba la 52 snem ka rta na ka shnong Umtasor, Ri-Bhoi District uba la shahkem ha ki Pulit ha ka 23 tarik Jymmang, 2024 halor ka jingsuba ba u dei uba donkti ban pynïap ïa uwei u samla ha iing sah jong u haka shnong Umtasor da kaba pom da ka wait nadien ryndang, u la khladnoh ha ka kti ki Pulit hadien ka jingshitom kaba la ktah ïa ka bor pyrkhat pyrdain.
Kum ban shu pyntip hangne, ha ka miet jong ka 23 tarik u Jymmang, 2024 uwei u rangbah uba la tip kyrteng kum u Bah Amison Muruh uba la 35 snem ka rta na ka shnong Umtasor u la shah pyniap da kaba shah mait nadien ryndang da ki kynja tiar ba nep haduh ba un da mynsaw jur bad khlad noh na kane ka sla pyrthei.
Ha kaba iadei bad kane ka jingjia, ki Pulit ki la kem noh ïa u Bah Phurly Suting ha ka 24 tarik Jymmang, 2024.
Katkum ka jingpyntip jong u Superintendent of Police ka Ri-Bhoi u Jagpal Singh Dhanoa, la iathuh hadien ba la kem ia u Bah Phurly Suting, ha ka jingtian bishar, ka Ingkashari jong ka Ribhoi District ka la aibor ban set lai sngi ha ka along jong ki Pulit na ka bynta ba kin ioh pynlong ia ka jingtohkit kaba bniah. Hynrei ha ka 25 tarik u Jymmang, 2024 u Bah Phurly Suting u la sdang leh kulmar bad pynpaw ia ki dak ba don jingpang ha ka bor pyrkhat. Ha kane hi ka sngi, ki Pulit ki la pynkit noh ïa u sha Nongpoh Civil Hospital ban ioh ka jingsumar hynrei na ka liang jong ki doctor ki la phah rah noh sha MIMHANS, Shillong namar ka jingpang kaba ktah ïa ka khlieh hynrei shuwa ban poi ha ka jaka sumar la pynbna ba u Bah Phurly u la khladnoh.
Ia ka met jong u Bah Phurly Suting la pynkit noh sha ka jaka buh metiap ha Civil Hospital, Shillong ban leh ïa ka post mortem bad ringdur da ka jingsakhi lang da u Magistrate na ka ophis u Deputy Commissioner ka East Khasi, u Medical Officer jong ka Civil Hospital, Shillong da kaba bud ryntih ia ki kyndon jong ka National Human Rights Commission.
Halor ka jingkhladnoh jong u Bah Phurly, ki Pulit ki la register ia ka UD Case ha Umiam Police Station ha ka 26 tarik, Jymmang, 2024 bad ka jingtohkit ka dang ïaid shakhmat.
