Hadien ba la mih ki khubor ïa ka jingud bad jingbynñiaw ki khynnah kiba ïaleh ïa ka eksamin SSLC 2024 khamtam ïa ka sobjek Social Sciences kaba dei ha ka sngi ba la kut artad ka eksamin kaba la long ha ka 15 tarik mynta u bnai ngi ïohi ha ki lad pathai khubor ba ki bor pynïaid jong ka Meghalaya Board of School Education (MBoSE) lyngba u Controller of Examination u la pynshai bad ïathuh ba ka daw jong ka jingshem jingeh jong ki khynnah kiba ïaleh ïa ka SSLC Exam 2024 ha ka Social Sciences ka dei namar ba don katto katne ki skul kim bym shym la pynthymmai ïa ki kot pule thymmai jong ki, kata,ki don ki skul kiba dang hikai da ki kot ki barim.
Kum kane ka jingpynshai na ki bor pynïaid ka MBoSE ka dei ka bym lah satia ban pdiang bad ka la nang paw penryngkew shuh shuh ban ïalam bakla ïa ki paidbah bym tip eiei. Ka paw pynban ki kam torti jong kane ka bor pynïaid eksamin ba pawnam tam ha Meghalaya.
Ka eksamin SSLC 2024 ka dei ka samoi pule (session) jong ki khynnah Class-X jong u snem 2023 tangba ka eksamin jong ki pat ka MBOSE ka pynïaleh ïa ki ha u snem 2024.
Ka jingpynkylla kot thymmai ha ki skul, ka MBoSE ka la pynmih kyrkieh dang ha ki bnai January-February 2024 shi taiew ne ar taiew eiei shwa ban plie skul jong u snem 2024. Ki Class-X kiba pule ha u snem 2024 ki dang pule da ki kot pule kiba rim. Kumno kin pule ïa ki kot thymmai ha u snem 2023 haba ki kot thymmai ki sdang pynthymmai ha u snem 2024?
Ki khynnah skul, ki kmie ki kpa, ki paidbah ki tip bha ba mynta u snem 2024, wat hadien shi taiew ar taiew ba la sdang ban long skul ruh bun ki khynnah skul kim pat ïoh kot pule satia ban thied na iew namarba pynkylla thymmai ka MBoSE ïa ki kot thymmai. Don ruh katto katne ki kmie ki kpa kiba ïathuh ba wat haduh mynta ruh, dang don sa iwei ar ki kot pule kiba kim pat ïoh satia ban thied namarba kim don ha dukan die kot.
Ban ong ba dei ba don ki skul kiba khlem pynthymmai ïa ki kot pule ha u snem 2023, shi snem shwa ban pynmih kot thymmai ka long kaba sngew sammut palat. Wat ki khynnah bad ki kmie ki kpa jong ki khynnah ruh kim lah pdiang satia ïa kum kine ki jingpynshai. Hato, ki kmie ki kpa bad ki paidbah ki sngew ïahap ïa kata? Wat kiba kham duna ka jingtip ïa nga- ïa phi ruh, kim lah ngeit satia ïa kum kata ka jingpynshai.
Ha ka jingshisha, ka MBoSE ka dei ban jubab hok ba lada don shisha ki jingbakla hangne hangtai, ka dei ban pyrkhat ban ïarap da kino kino ki lad katba ka sngew dei ban leh, ym dei pat ban shu darapjot ba paw pewryngkew pynban ki kam torti jong ka bad kam dei ban ïalehkai ïa ka lawei bad ka ïap ka im jong ki khynnah pule.
Ban tap eit miaw ïa la ka iwtung, kam dei satia ïa ki bor pynïaid eksamin ba donburom kum ka MBoSE.
Kumno ki kmie ki kpa, ki sengbhalang bapher bapher ki sngew halor kane ka kam kaba ktah shisha ïa ka lawei ka jingpule ki khynnah bapli? Hato, sngew dei hi ban shu phah ne ai ka jingkitbok jingrwiang shwa ban long eksamin katba ynda ïa kynduh jingeh pat ki khynnah ngin shu ïa khaprip ngaiñ ngaiñ?
Lada ki khun jong phi ki phiel ei shi snem, khlem pyrkhat lem katno ka jingduh jong ki? Ynnai ïakren ïa ka bai skul, bai kot, bai kali, bad kiwei kiwei ba phi la pynlut ha ka shisnem. Hynrei kaba kham shyrkhei eh dei ka jinghiar jong ki ïa ka jingïoh mark ha ka Social Sciences mynta u snem. Ha ka jaka ba kin ïoh First Division, ki khun jong phi kin poi noh tang ha ka Mark jong ka kyrdan 2nd ne 3rd Division. Don pat ki ban pass tang san (5) sobjek. Dei hangne ba ka ktah ïa ka lawei jong ki khamtam kiba kwah pule shabar ne ha ki skul ne College ba kham paw.
