Shillong, Jylliew, 16: Ka Hynñiewtrep Youths Council (HYC) Seng Kmie mynta ka janmiet sngi Thohdieng ka la pyllait paidbah ia ki Jersey Football jong ka PFR Football Academy Women’s Players ki ban sa iashim bynta ha ka Women’s League Tournament ba la pyniaid da ka Shillong Sports Association (SSA).
Ia kine ki Jersey la pyllait paitbah da u Sports Secretary ka HYC u Bah Franky Kharumnuid ha madan Malki, Shillong.
U Sports Secretary u la sneng la kraw bad ai mynsiem ia kitei ki thei ialehkai ba kin trei shitom hashwa ba kin leit iashim bynta ha katei ka Tournament khnang ba kin dup poi sha ki kliar jong ka nam.
U la ai mynsiem ruh ba kin pyndonkam hok ia ka sap kaba u Nongbuh Nongthaw u la ai sha ki, ha kajuh ka por u la kyntu ruh ia ki, ba kim dei ban klet pat ia ka pule puthi.
Ia ki Jersey la pyllait paidbah ar tylli, kawei na bynta ka jingiakhun ha la iing (Home) da ka rong Blue katba kawei pat shabar na la iing (away) da ka rong Stem.
Kane ka long katkum u kyrwoh ba la pyllait da u Assistant Sports Secretary u Yodahunki Shylla.
